აირჩიეთ ქალაქი აირჩიეთ ქალაქი

PSP-ს ელექტრონული ვაჭრობის პლატფორმით სარგებლობის წესები და პირობები

(სავაჭრო პოლიტიკა)

1. ინფორმაცია მოვაჭრის შესახებ

  • საფირმო სახელწოდება: შპს ,,პსპ ფარმა“

  • საიდენტიფიკაციო ნომერი: 202203123

  • იურიდიული/ფაქტობრივი მისამართი: საქართველო, ქ.თბილისი, დავით აღმაშენებლის გამზ. N 148

მოვაჭრესთან საკომუნიკაციო არხები:

• საკომუნიკაციო ელექტრონული ფოსტა: online@psp.ge

• PSP ქოლ-ცენტრის საკომუნიკაციო ტელეფონის ნომერი: +995 (032) 240 20 20 (ცხელი ხაზი)

• პლატფორმაზე ინტეგრირებული ჩათ-ბოტი - ,,PSP ასისტენტი’’

2. ზოგადი დებულებები

2.1. PSP-ს ელექტრონული ვაჭრობის პლატფორმით სარგებლობის წესები და პირობები (შემდგომში - წესები და პირობები) წარმოადგენს PSP-ს და მომხმარებელს შორის დადებულ სავალდებულო ძალის მქონე ორმხრივ ხელშეკრულებას და არეგულირებს PSP-სა და მომხმარებელს შორის სამართლებრივ ურთიერთობებს, რომლებიც წარმოიშვება PSP-ს ელექტრონული ვაჭრობის პლატფორმით (შემდგომში - პლატფორმა) სარგებლობისას და პლატფორმის საშუალებით დისტანციური ელექტრონული ვაჭრობისას.

2.2. წესებისა და პირობების მიზანია, მომხმარებლის მიერ პლატფორმით სარგებლობისა და ელექტრონული ვაჭრობის შემთხვევაში:

  • განსაზღვროს PSP-სა და მომხმარებელსა შორის სამართლებრივი ურთიერთობის საფუძვლები და პრინციპები, საქართველოს კანონმდებლობის შესაბამისად;

  • უზრუნველყოს მომხმარებლისთვის შეთავაზებული პროდუქტის ან/და მისი მიწოდების პირობების თაობაზე სრული, გონივრული და სათანადო ინფორმაციის წინასწარი მიწოდება, რათა მომხმარებელმა შეძლოს ინფორმირებული გადაწყვეტილების მიღება;

  • უზრუნველყოს პლატფორმაზე სანდო და უსაფრთხო დისტანციური ელექტრონული ვაჭრობა;

  • უზრუნველყოს პლატფორმაზე სამართლიანი, გამჭვირვალე და დისკრიმინაციისაგან თავისუფალი ელექტრონული ვაჭრობა;

  • ხელი შეუწყოს PSP-ს და მომხმარებლებს შორის ურთიერთპატივისცემაზე დამყარებული ქცევის კულტურის განვითარებას.

2.3. წესები და პირობები მოიცავს, მაგრამ არ შემოიფარგლება შემდეგი საკითხებით: პლატფორმით სარგებლობისა და გამოყენების წესები, პლატფორმის საშუალებით დისტანციური ელექტრონული ვაჭრობის პროცედურები და წესები, PSP-საგან პროდუქტის ნასყიდობის არსებითი პირობები, მომხმარებელთა უფლებებისა და მოვალეობების განხორციელების წესები და პროცედურები.

2.4. წინამდებარე წესები და პირობები წარმოადგენს PSP-ს მიერ მომხმარებლისათვის დადგენილ, წინასწარ ჩამოყალიბებულ, მრავალჯერადი გამოყენებისთვის გამიზნულ სტანდარტულ პირობებს. ნებისმიერი პირობა, რომელიც მისი ორაზროვნად განმარტების საშუალებას იძლევა, მომხმარებლის სასარგებლოდ განიმარტება.

2.5. წესები და პირობები (მათ შორის, მისი ყველა დანართი, დამატებითი შეთანხმება ან/და ცვლილება) ვრცელდება და სავალდებულოა ყველა იმ მომხმარებლისათვის, რომელიც სარგებლობს პლატფორმით ან/და პლატფორმის საშუალებით დისტანციურად ახორციელებს ელექტრონულ ვაჭრობასა და პროდუქტის შეძენას.

2.6. წინამდებარე წესები და პირობები არ ვრცელდება იმ სამართლებრივ ურთიერთობებზე, რომლებიც წარმოიშობა მომხმარებლის მიერ პროდუქტის უშუალოდ ადგილზე შეძენისას, როდესაც იგი პროდუქტის შერჩევას, გადახდასა და მიღებას სრულად ახორციელებს ფიზიკურ სივრცეში - PSP-ს კუთვნილ ან მისი სავაჭრო ნიშნის ქვეშ მოქმედ აფთიაქებსა და სხვა სავაჭრო ობიექტებში.

2.7. პლატფორმით სარგებლობისას ან/და პლატფორმის საშუალებით დისტანციური ელექტრონული ვაჭრობისას, მომხმარებლისათვის სავალდებულოა იმ დროისათვის პლატფორმაზე განთავსებული და მომხმარებლისათვის ხელმისაწვდომი წესებისა და პირობების მოქმედი ვერსია.

2.8. წინამდებარე წესები და პირობები, პლატფორმის გამოყენების პროცესში დადებულ სამომხმარებლო ხელშეკრულებებთან ან/და სხვა შეთანხმებებთან ერთად (მათ შორის, ნასყიდობის, მიწოდების ან გადახდის დადასტურების შესახებ დოკუმენტები), ქმნის მხარეთა შორის დადებულ ერთიან, მთლიან და სავალდებულო იურიდიული ძალის მქონე შეთანხმებას.

2.9. წინამდებარე წესებსა და პირობებსა და მის ნებისმიერ დანართს შორის წინააღმდეგობისას, უპირატესობა ენიჭება ამ წესებსა და პირობებს, გარდა იმ შემთხვევისა, როდესაც ამ დანართით პირდაპირ არის დადგენილი მისი უპირატესი სამართლებრივი ძალა კონკრეტულ საკითხზე.

2.10. წესებსა და პირობებს გააჩნია უპირატესი სამართლებრივი ძალა პლატფორმაზე განთავსებულ ნებისმიერ სხვა მარკეტინგულ თუ ვიზუალურ ინფორმაციასთან, კონტენტთან ან/და მათ შინაარსთან მიმართებით.

2.11. წესები და პირობები შედგენილია ქართულ ენაზე. სხვა ენაზე არსებულ თარგმანთან შეუსაბამობის შემთხვევაში, უპირატესობა ენიჭება ქართულენოვან ორიგინალ ვერსიას.

3. ტერმინთა განმარტება

წინამდებარე წესებსა და პირობებში გამოყენებულ ტერმინებსა და განმარტებებს აქვთ ქვემოთ განსაზღვრული მნიშვნელობა, გარდა იმ შემთხვევებისა, თუ კონტექსტიდან აშკარად სხვა რამ არ გამომდინარეობს:

3.1. PSP, პსპ ან მოვაჭრე - შპს „პსპ ფარმა“, რეგისტრირებული საქართველოს კანონმდებლობის შესაბამისად, საიდენტიფიკაციო ნომერი: 202203123; იურიდიული/ფაქტობრივი მისამართი: საქართველო, ქ.თბილისი, დავით აღმაშენებლის გამზირი №148; საკომუნიკაციო ელექტრონული ფოსტა: online@psp.ge; საკომუნიკაციო ტელეფონის ნომერი: +995 (032) 240 20 20 (PSP ქოლ-ცენტრი);

3.2. მომხმარებელი - პლატფორმით მოსარგებლე 18 წელს მიღწეული, ქმედუნარიანობის მქონე ფიზიკური პირი (როგორც რეგისტრირებული, ისე არარეგისტრირებული), რომელსაც სთავაზობენ ან რომელიც იძენს ან შემდგომ იყენებს პროდუქტს უპირატესად პირადი მოხმარების მიზნით და არა სავაჭრო, სამეწარმეო, სახელობო ან სხვა პროფესიული საქმიანობის განსახორციელებლად.

3.3. პროდუქტის მიმღები - მომხმარებელი ან მის მიერ მითითებული სხვა 18 წელს მიღწეული, ქმედუნარიანი ფიზიკური პირი, რომელიც უფლებამოსილია ფაქტობრივად ჩაიბაროს მომხმარებლის მიერ პლატფორმის საშუალებით შეძენილი პროდუქტი;

3.4. მხარეები - მომხმარებელი და PSP ერთობლივად;

3.5. PSP-ს ელექტრონული ვაჭრობის პლატფორმა ან პლატფორმა - PSP-ს საკუთრებაში ან მისი მართვის ქვეშ არსებული ციფრული სივრცე, რომელიც მოიცავს ვებგვერდს www.psp.ge (შემდგომში - ვებგვერდი), მის მობილურ ვერსიასა და მობილურ აპლიკაციას „PSP APP“ (შემდგომში -მონილური აპლიკაცია), რომელთა საშუალებითაც უშუალოდ ხორციელდება პროდუქციის ელექტრონული ვაჭრობა და დისტანციური სამომხმარებლო ხელშეკრულების დადება;

3.6. პროდუქტი ან საქონელი - PSP-ს საკუთრებაში ან კანონიერ მფლობელობაში არსებული და პლატფორმაზე სარეალიზაციოდ განთავსებული ნებისმიერი მოძრავი ნივთი (მათ შორის, ფარმაცევტული პროდუქტი, სამკურნალო საშუალება, თავის მოვლისა და კოსმეტიკური საშუალებები) ან/და ციფრული ფორმით გავრცელებული ქონებრივი სიკეთე;

3.7. ფარმაცევტული პროდუქტი ან სამკურნალო საშუალება - წამალი ან ფიზიოლოგიურად აქტიური, ბუნებრივი ან სინთეზური გზით მიღებული ნივთიერება ან მათი კომბინაცია, რომლის ადამიანის ორგანიზმზე ზემოქმედება განპირობებულია ფარმაკოლოგიური, იმუნოლოგიური ან მეტაბოლური მოქმედებით და რომელიც ნებადართულია სამედიცინო გამოყენებისთვის, მათ შორის, ფარმაცევტული პროდუქტის სახელმწიფო რეგისტრაციის ეროვნული რეჟიმით ნებაყოფლობით რეგისტრირებული კომპლემენტარული სამკურნალო საშუალება, ბიოლოგიურად აქტიური დანამატი (ბად), პარასამკურნალო საშუალება;

3.8. პროდუქტის გასაყიდი ფასი - პლატფორმაზე მითითებული პროდუქტის ერთეულის ან განსაზღვრული რაოდენობის საბოლოო ფასი საქართველოს ეროვნულ ვალუტაში (ლარში), რომელიც მოიცავს დამატებული ღირებულების გადასახადსა (დღგ) და ყველა სხვა მოქმედ გადასახადს.

3.9. პროდუქტის ერთეულის ფასი - პროდუქტის საბოლოო ფასი დამატებული ღირებულების გადასახადისა და სხვა გადასახადების ჩათვლით, შემდეგი ერთეულებისთვის: ერთი კილოგრამი, ერთი ლიტრი, ერთი მეტრი, ერთი კვადრატული მეტრი, ერთი კუბური მეტრი, ან სხვა ერთეულებისთვის, რომლებიც, როგორც წესი, საქართველოში საზომად გამოიყენება;

3.10. PSP-ს ელექტრონული ვაჭრობის პლატფორმით სარგებლობის წესები და პირობები, წესები და პირობები, PSP-ს ელექტრონული ვაჭრობის სავაჭრო პოლიტიკა ან სავაჭრო პოლიტიკა - წინამდებარე დოკომენტი, რომელიც წარმოადგენს PSP-ს და მომხმარებელს შორის დადებულ სავალდებულო ძალის მქონე ორმხრივ ხელშეკრულებას, რომელიც არეგულირებს მხარეთა შორის პლატფორმით სარგებლობისას და პლატფორმის საშუალებით დისტანციური ელექტრონული ვაჭრობისას წარმოშობილ სამართლებრივ ურთიერთობებს;

3.11. სამომხმარებლო ხელშეკრულება ან დისტანციური სამომხმარებლო ხელშეკრულება - პლატფორმის საშუალებით, მხოლოდ დისტანციური კომუნიკაციის არხების გამოყენებით (მომხმარებლისა და მოვაჭრის ფიზიკური თანაყოფობის გარეშე) დადებული ნასყიდობის შეთანხმება, რომლის ძირითად ზოგად სამართლებრივ ჩარჩოსაც წარმოადგენს წინამდებარე წესები და პირობები.

3.12. დაკავშირებული ხელშეკრულება - ხელშეკრულება, რომლითაც მომხმარებელი იძენს პროდუქტს ან მომსახურებას და რომელიც დაკავშირებულია დისტანციურ სამომხმარებლო ხელშეკრულებასთან, ამასთანავე, ეს პროდუქტი მიწოდებულია PSP-ს ან მესამე პირის მიერ, PSP-სა და მესამე პირს შორის დადებული შეთანხმების საფუძველზე;

3.13. PSP აფთიაქი, პსპ აფთიაქი, აფთიაქი, ფიზიკური აფთიაქი ან ფიზიკური სავაჭრო ობიექტი - PSP-ს კუთვნილი ან PSP-ს სავაჭრო ნიშნის ქვეშ მოქმედი ფიზიკური აფთიაქი, ფარმაცევტული პროდუქტის რეალიზატორი ან/და სხვა სავაჭრო ობიექტები, სადაც PSP ჩვეულებრივ ახორციელებს თავის ეკონომიკურ/კომერციულ საქმიანობას;

3.14. ლოქერი, თვითმომსახურების ტერმინალი ან თვითმომსახურების მოწყობილობა - პლატფორმაზე ინტეგრირებული, PSP-ს ან მისი პარტნიორი/კონტრაქტორი მესამე პირის მფლობელობაში არსებული ავტომატიზებული ციფრული თვითმომსახურების მოწყობილობა (უჯრები), სადაც ხდება მომხმარებლის მიერ პლატფორმის საშუალებით შეძენილი პროდუქტის დროებითი განთავსება თვითგატანის მიზნით;

3.15. კანონისმიერი გარანტია - „მომხმარებლის უფლებების დაცვის შესახებ“ საქართველოს კანონით დადგენილი მომხმარებლის უფლება, პროდუქტის გადაცემიდან 2 (ორი) წლის განმავლობაში აღმოჩენილი ნაკლის შემთხვევაში მოსთხოვოს მოვაჭრეს ნაკლიანი პროდუქტის უსასყიდლოდ შეკეთება, შეცვლა, ფასის შემცირება ან სამომხმარებლო ხელშეკრულებაზე უარის თქმა;

3.16. კომერციული გარანტია - მოვაჭრის ან მწარმოებლის (გარანტიის გამცემის) მიერ, სამომხმარებლო ხელშეკრულებასთან შესაბამისობის უზრუნველყოფის ვალდებულების გარდა, მომხმარებლის სასარგებლოდ დამატებით და უსასყიდლოდ ნაკისრი გადახდილი ფასის ანაზღაურების, პროდუქტის შეცვლის, შეკეთების ან მომსახურების სხვა ვალდებულებები, რომლებიც სამომხმარებლო ხელშეკრულებასთან შეუსაბამობის აღმოფხვრის ვალდებულებიდან არ გამომდინარეობს;

3.17. საგადახდო საშუალება - პლატფორმის საშუალებით შეძენილი პროდუქტის/შეკვეთის ღირებულების გადახდისათვის მომხმარებლის მიერ გამოყენებული ინსტრუმენტი (მათ შორის, საბანკო ბარათი, ციფრული საფულე ან ონლაინ გადახდის სხვა ელექტრონული მეთოდი);

3.18. კონტენტი - პლატფორმის შემადგენელი ნებისმიერი ციფრული ელემენტი, მათ შორის, პროგრამული კოდი, მონაცემთა ბაზები, დიზაინი, ინტერფეისი, გრაფიკა, ფოტო, ვიდეო, აუდიო, ტექსტები, სავაჭრო ნიშნები და ლოგოები;

3.19. დანართი - პლატფორმაზე განთავსებული ნებისმიერი დოკუმენტი, დებულება, პოლიტიკა, პირობები ან/და ნებისმიერი სხვა დოკუმენტი, რომელზეც მითითებას აკეთებს წინამდებარე წესები და პირობები ან მისი სხვა დანართები (ასეთის არსებობის შემთხვევაში). ყოველი ასეთი დოკუმენტი მათგანი წარმოადგენს ამ წესებისა და პირობების განუყოფელ ნაწილს, მოქმედებს მასთან ერთობლიობაში და სრულად სავალდებულოა მომხმარებლისთვის.

3.20. PSP ასისტენტი - პლატფრომაზე ინტეგრირებული ავტომატიზებული სისტემა (ჩათ-ბოტი), რომელიც მომხმარებლისთვის სწრაფი საინფორმაციო მხარდაჭერის გასაწევად იყენებს წინასწარ განსაზღვრულ ალგორითმებს, ხელოვნურ ინტელექტს ან/და PSP-ს უფლებამოსილი პირის (ოპერატორის) პირდაპირ ჩართულობას.

3.21. პერსონალური მონაცემი − ნებისმიერი ინფორმაცია, რომელიც იდენტიფიცირებულ ან იდენტიფიცირებად ფიზიკურ პირს უკავშირდება. ფიზიკური პირი იდენტიფიცირებადია, როდესაც შესაძლებელია მისი იდენტიფიცირება პირდაპირ ან არაპირდაპირ, მათ შორის, სახელით, გვარით, საიდენტიფიკაციო ნომრით, გეოლოკაციის მონაცემებით, ელექტრონული კომუნიკაციის მაიდენტიფიცირებელი მონაცემებით, ფიზიკური, ფიზიოლოგიური, ფსიქიკური, ფსიქოლოგიური, გენეტიკური, ეკონომიკური, კულტურული ან სოციალური მახასიათებლით.

4. წესებსა და პირობებზე მომხმარებლის თანხმობის გამოხატვა

4.1. ნებისმიერი მომხმარებელი, რომელსაც სურს ისარგებლოს პლატფორმით, ვალდებულია სრულად გაეცნოს და ჯეროვნად დაიცვას წინამდებარე წესები და პირობები, მათ შორის მისი ყველა დანართი. წინააღმდეგ შემთხვევაში, მომხმარებელმა უნდა შეწყვიტოს პლატფორმით სარგებლობა.

4.2. პლატფორმის საშუალებით პროდუქტის შესაძენად, მომხმარებელი ვალდებულია პროდუქტის შეძენამდე (ღილაკზე ,,გადახდა“ დაჭერამდე) სრულად გაეცნოს წინამდებარე წესებსა და პირობებს და გამოხატოს მათზე თანხმობა. თანხმობის გარეშე, მომხმარებელი ვერ შეძლებს პლატფორმის საშუალებით პროდუქტის შეძენას.

4.3. მომხმარებლის მიერ წესებსა და პირობებზე თანხმობის გამოხატვა ხორციელდება დისტანციურად, ელექტრონული ფორმით, პლატფორმაზე განთავსებულ შესაბამის ველში მონიშვნით (ე.წ. „Check-box“) ან ღილაკზე „ვეთანხმები წესებსა და პირობებს“ დაჭერით.

4.4. წესებზე და პირობებზე თანხმობის გამოხატვით მომხმარებელი ადასტურებს, რომ მან წაიკითხა და გაცნობიერებული აქვს წესებისა და პირობების შინაარსი და კისრულობს ვალდებულებას ჯეროვნად დაიცვას წესები და პირობები.

4.5. წინამდებარე წესები და პირობები ძალაში შედის მომხმარებლის მიერ თანხმობის გამოხატვის მომენტიდან და მოქმედებს განისაზღვრელი ვადით, პლატფორმაზე მომხმარებლის ანგარიშის გაუქმებამდე ან/და წინამდებარე წესებითა და პირობებით ან/და კანონმდებლობით დადგენილი წესით სამართლებრივი ურთიერთობის შეწყვეტამდე.

4.6. წესებსა და პირობებზე თანხმობის გამოხატვით, მომხმარებელი ადასტურებს, რომ ინფორმირებულია და გაეცნო პლატფორმის პერსონალურ მონაცემთა დამუშავების პოლიტიკა (შემდგომში - კონფიდენციალობის პოლიტიკა). კონფიდენციალობის პოლიტიკა, რომელიც განთავსებულია პლატფორმაზე ცალკე გვერდზე (იხ. ბმული: https://psp.ge/privacy-policy) წარმოადგენს წინამდებარე წესებისა და პირობების დანართს, მის განუყოფელ ნაწილს, მოქმედებს მასთან ერთობლიობაში და სრულად სავალდებულოა მომხმარებლისთვის.

5. ინფორმაცია პლატფორმის შესახებ

5.1. პლატფორმა მომხმარებელს აძლევს შესაძლებლობას დისტანციური ფორმით, ელექტრონული კომუნიკაციის საშუალებების გამოყენებით, სწრაფად და მარტივად შეიძინოს სანდო, უსაფრთხო და ხარისხიანი პროდუქტი, მათ შორის და არა მხოლოდ, ფარმაცევტული პროდუქტი, ბიოლოგიურად აქტიური დანამატები (ბად), ვიტამინები, სურსათის (სასურსათო) დანამატები, ბავშვთა კვება, ბავშვის ფორმულა, სამედიცინო დანიშნულების საქონელი, დეკორატიული კოსმეტიკა, ჰიგიენისა და თავის მოვლის საშუალებები.

5.2. პლატფორმა წარმოადგენს ერთიან ციფრულ სივრცეს და მოიცავს: ვებგვერდს www.psp.ge და მობილურ აპლიკაციას ,,PSP APP’’.

5.3. წესები და პირობები წარმოადგენს ერთიან სამართლებრივ დოკუმენტს, რომელიც სრულად და თანაბრად ვრცელდება ვებგვერდითა და მობილური აპლიკაციით სარგებლობაზე, მათ გამოყენებასა და პლატფორმის საშუალებით დისტანციურად პროდუქტის შეძენისას წარმოშობილ ყველა ურთიერთობაზე.

5.4. პლატფორმა გამიზნულია იმ მომხმარებლებისათვის, რომლებიც დაინტერესებულნი არიან პროდუქტის შეძენითა და მისი მიღებით საქართველოს ტერიტორიაზე.

5.5. პლატფორმაზე სარეალიზაციოდ შეთავაზებული პროდუქტების შეძენა და შეძენილი პროდუქტის მიწოდება ხელმისაწვდომია მხოლოდ საქართველოს ტერიტორიაზე.

6. პლატფორმაზე ინფორმაციის განთავსება

6.1. PSP კისრულობს ვალდებულებას პლატფორმის საშუალებით პროდუქტის შეძენამდე მომხმარებელს მკაფიოდ, გასაგებად და ქართულ ენაზე მიაწოდოს სრული და უტყუარი ინფორმაცია, რომელიც ხელმისაწვდომი იქნება პლატფორმაზე განთავსებით ან/და დისტანციური კომუნიკაციის სხვა საშუალებებით. ეს ინფორმაცია მოიცავს , მაგრამ არ შემოიფარგლება შემდეგით:

6.1.1. პროდუქტის მახასიათებლები: პროდუქტის დასახელება, მწარმოებლის სახელწოდება და პროდუქტის ძირითადი/არსებითი მახასიათებლები;

6.1.2. ინფორმაცია მოვაჭრეზე და მისი საკონტაქტო მონაცემები: სახელწოდება, საიდენტიფიკაციო ნომერი, იურიდიული და ფაქტობრივი მისამართი, ელექტრონული ფოსტის მისამართი და ტელეფონის ნომერი;

6.1.3. ტექნიკური მომსახურება: პროდუქტის შეცვლის, შეკეთებისა და ტექნიკური მომსახურების ობიექტის დასახელება და მისამართი, თუ ის განსხვავდება PSP-ს იურიდიული ან ფაქტობრივი მისამართებისგან (ასეთის არსებობის შემთხვევაში);

6.1.4. პროდუქტის ფასი და ხარჯები: პროდუქტის ფასი საქართველო კანონმდებლობით დადგენილი გადასახადების ჩათვლით, ასევე, ინფორმაცია ძირითადი ხარჯებისა და ყველა დამატებითი ხარჯების თაობაზე (მათ შორის, არსებობის შემთხვევაში, მიწოდების, გადაზიდვის, ტრანსპორტირების, გადაგზავნის ან/და საფოსტო ხარჯები, პროდუქტის მონტაჟისა და სხვა ხარჯის ჩათვლით). თუ, აღნიშნული ფასის წინასწარ გამოთვლა შეუძლებელია, ინფორმაცია მისი გამოთვლის წესის თაობაზე და გაფრთხილება იმის შესახებ, რომ შეიძლება დამატებითი ხარჯები წარმოიშვას;

6.1.5. კომუნიკაციის ხარჯები: ინფორმაცია დისტანციური კომუნიკაციის საშუალების გამოყენების ხარჯის შესახებ, თუ ეს ხარჯი ძირითად ფასში არ შედის;

6.1.6. გადახდისა და მიწოდების პირობები: ინფორმაცია გადახდის, პროდუქტის მიწოდებისა და ვალდებულების შესრულების პირობების შესახებ (ასეთის არსებობის შემთხვევაში).

6.1.7. მომხმარებლის მოთხოვნის განხილვა: PSP-ს მიერ მომხმარებლის მოთხოვნის განხილვის წესი;

6.1.8. კანონისმიერი გარანტია: ინფორმაცია კანონისმიერი გარანტიის შესახებ;

6.1.9. კომერციული გარანტია: ინფორმაცია კომერციული გარანტიისა და შემდგომი მომსახურების გაწევის პირობების შესახებ (ასეთის არსებობის შემთხვევაში);

6.1.10. სამომხმარებლო ხელშეკრულება უარის თქმა: ინფორმაცია სამომხმარებლო ხელშეკრულების მოქმედების ვადის, ასევე, სამომხმარებლო ხელშეკრულებაზე უარის თქმის პირობებისა და წესის თაობაზე.

თუ სამომხმარებლო ხელშეკრულებაზე მომხმარებლის მხრიდან უარის თქმა შესაძლებელია, PSP ვალდებულია უზრუნველყოს მომხმარებელი სამომხმარებლო ხელშეკრულებაზე უარის თქმის შემთხვევაში შესავსები სპეციალური ფორმით (იხ. N 1 დანართი), რომელიც წარმოადგენს წინამდებარე წესებისა და პირობების განუყოფელ ნაწილს.

6.1.11. სამომხმარებლო ხელშეკრულებაზე უარის თქმის შეუძლებლობა: ინფორმაცია იმ შემთხვევების შესახებ, როდესაც კანონმდებლობის შესაბამისად მომხმარებელს არ აქვს უფლება უარი თქვას სამომხმარებლო ხელშეკრულებაზე;

6.1.12. დაბრუნების ხარჯები: ინფორმაცია სამომხმარებლო ხელშეკრულებაზე უარის თქმის შემთხვევაში, პროდუქტის დაბრუნებასთან დაკავშირებით გასაწევი ხარჯის შესახებ, თუ, პროდუქტის ბუნებიდან გამომდინარე, მისი ფოსტით დაბრუნება შეუძლებელია;

6.1.13. მომხმარებლის ვალდებულებები: მომხმარებლის ვალდებულებებისა და მათი შესრულების მინიმალური ვადის/მოქმედების ხანგრძლივობის შესახებ (ასეთის არსებობის შემთხვევაში);

6.1.14. ციფრული შინაარსი: ციფრული შინაარსის (მონაცემები, რომლებიც ციფრული ფორმით არის წარმოებული ან მიწოდებული) ფუნქციური მახასიათებლების შესახებ, მათ შორის, არსებობის შემთხვევაში − მისი დაცვისთვის გამოყენებული ტექნიკური საშუალებების თაობაზე, აგრეთვე არსებობის შემთხვევაში − ციფრული შინაარსის აპარატულ ან პროგრამულ უზრუნველყოფასთან თავსებადობის შესახებ ნებისმიერი ინფორმაცია, რომელიც PSP-მ იცის ან უნდა სცოდნოდა;

6.1.15. ფინანსური უზრუნველყოფა: PSP-ს მოთხოვნის შემთხვევაში მომხმარებლის მიერ წარსადგენი ან გადასახდელი ფინანსური უზრუნველყოფის პირობების თაობაზე (ასეთის არსებობის შემთხვევაში);

6.1.16. ქცევის კოდექსი: ინფორმაცია ქცევის კოდექსის არსებობის და ხელმისაწვდობის თაობაზე (მიმდინარე მდგომარეობით PSP არ აქვს შემუშავებული ქცევის კოდექსი).

6.2. წესებისა და პირობების 6.1. პუნქტით განსაზღვრული ინფორმაცია, წესებისა და პირობების განუყოფელი ნაწილია და შეიძლება შეიცვალოს მხოლოდ მხარეების მიერ აშკარად გამოხატული თანხმობის არსებობის შემთხვევაში.

6.3. PSP-ს უფლება აქვს, თავისი სამეწარმეო მიზნებისათვის მომხმარებელს მიაწოდოს უფრო მეტი ინფორმაცია, ვიდრე ეს გათვალისწინებულია ამ წესებისა და პირობების 6.1. პუნქტით.

6.4. PSP უზრუნველყოფს, რომ პლატფორმის საშულებით პროდუქტის შეძენამდე პლატფორმაზე მკაფიო და გასაგები ფორმით განათავსოს ნებისმიერი ინფორმაცია მის მიწოდებასთან დაკავშირებული შეზღუდვების შესახებ (ასეთის არსებობის შემთხვევაში), აგრეთვე ინფორმაცია გადახდის საშუალების თაობაზე.

7. მოვაჭრის ვალდებულებები

7.1. PSP კისრულობს ვალდებულებას წესებითა და პირობებით/სამომხმარებლო ხელშეკრულებით გათვალისწინებული ვალდებულებები და მოთხოვნები შეასრულოს სრულად, ჯეროვნად და კეთილსინდიერად.

7.2. მომხმარებლის მიერ შესაბამისი სამომხმარებლო ხელშეკრულებით გათვალისწინებული შეკვეთის/პროდუქტის ღირებულების სრულად გადახდის შემდგომ, PSP ვალდებულია გადასცეს მომხმარებელს სამომხმარებლო ხელშეკრულების პირობების შესაბამისი პროდუქტი, მათ შორის, მისი თანხმლები ყველა ნივთი (ნაწილები, აქსესურები) ან/და დოკუმენტაცია (მათ შორის, ინსტრუქცია, საგარანტიო ფურცელი), ასეთის არსებობის შემთხვევაში.

7.3. პროდუქტი სამომხმარებლო ხელშეკრულებით გათვალისწინებული პირობების შესაბამის პროდუქტად მიიჩნევა, თუ იგი შეესაბამება PSP-ს მიერ მომხმარებლისთვის მიწოდებულ აღწერას/ინფორმაციას და მას აქვს იგივე მახასიათებლები, რომლებიც PSP-ს მიერ მომხმარებლისთვის წარდგენილ პროდუქტის ნიმუშს (მათ შორის, იგულისხმება პლატფორმაზე განთავსებული ფოტოს ან/და ვიდეო გამოსახულებას) ჰქონდა.

7.4. PSP-ს მიერ მომხმარებლისთვის მიწოდებული პროდუქტის აღწერის/ინფორმაციის არარსებობის შემთხვევაში, პროდუქტი მომხმარებლის სამომხმარებლო ხელშეკრულებით გათვალისწინებული პირობების შესაბამის პროდუქტად მიიჩნევა, თუ იგი გამოსადეგია იმ მიზნისთვის, რომლის თაობაზედაც მომხმარებელმა PSP-ს სამომხმარებლო ხელშეკრულების დადების პროცესში აცნობა და რომელსაც PSP დაეთანხმა.

7.5. თუ მომხმარებელი PSP-ს სამომხმარებლო ხელშეკრულების დადების პროცესში PSP-ს არ აცნობებს იმ მიზნის თაობაზე, რომლისთვისაც მას სურს პროდუქტის გამოყენება, პროდუქტი სამომხმარებლო ხელშეკრულების პირობების შესაბამის პროდუქტად მიიჩნევა, თუ იგი ვარგისია იმ მიზნით სარგებლობისთვის, რომლისთვისაც, ეს პროდუქტი ჩვეულებრივ, გამოიყენება.

7.6. თუ პროდუქტის ჩვეულებრივი გამოყენების მიზანი ვერ დგინდება, პროდუქტი სამომხმარებლო ხელშეკრულებით გათვალისწინებული პირობების შესაბამის პროდუქტად მიიჩნევა, თუ მას აქვს ამ სახეობის პროდუქტის თვისებები და ფუნქციონირებს ისე, როგორც აღნიშნული სახეობის პროდუქტი, ამასთანავე, რისი გონივრული მოლოდინიც მომხმარებელს შეიძლებოდა ჰქონოდა პროდუქტის ბუნებიდან და იმ საჯარო განცხადებებიდან გამომდინარე, რომლებიც გააკეთა PSP-მ, მწარმოებელმა, მისმა წარმომადგენელმა ან ბაზარზე განთავსებისთვის პასუხისმგებელმა სხვა პირმა, მათ შორის, რეკლამის ან/და ეტიკეტის საშუალებით.

7.7. თუ პროდუქტზე თანდართული ინსტრუქციის ნაკლოვანების გამო, მომხმარებლმა შეძენილი პროდუქტი არასწორად ააწყო ან დაამონტაჟა, არასწორად აწყობის/დამონტაჟების შედეგად წარმოქმნილი პროდუქტის ნაკლი უთანაბრდება სამომხმარებლო ხელშეკრულებით გათვალისწინებულ პირობებთან შეუსაბამობას (ნაკლს).

7.7.1. სამომხმარებლო ხელშეკრულების მიზენებისათვის პროდუქტი ნაკლის მქონე პროდუქტად არ მიიჩნევა, თუ სამომხმარებლო ხელშეკრულების დადების მომენტში მომხმარებელმა იცოდა ან უნდა სცოდნოდა, რომ პროდუქტს ნაკლი ჰქონდა.

7.7.2. PSP-ს არ დაეკისრება პასუხისმგებლობა პროდუქტის შესახებ საჯარო განცხადებისთვის, თუ დაამტკიცებს, რომ:

ა) მას არ ჰქონდა ან ვერ ექნებოდა ინფორმაცია ამ განცხადების შესახებ;

ბ) სამომხმარებლო ხელშეკრულების დადებამდე PSP-ს საჯარო განცხადებაში მოცემული ინფორმაცია შეიცვალა;

გ) PSP-ს საჯარო განცხადება ვერ მოახდენდა გავლენას მომხმარებლის მიერ პროდუქტის შეძენაზე.

8. მომხმარებლის განცხადებები და გარანტიები

8.1. სარგებლობის წესებსა და პირობებზე თანხმობის გამოხატვით, მომხმარებელი აცხადებს და იძლევა გარანტიას შემდეგზე:

8.1.1. არის 18 წლის ასაკს მიღწეული, სრული ქმედუნარიანობის მქონე ფიზიკური პირი;

8.1.2. სრულად გაეცნო წინამდებარე წესებსა და პირობებს/სამომხმარებლო ხელშეკრულებას და აცნობიერებს მისგან გამომდინარე სამართლებრივ შედეგებს;

8.1.3. ფლობს სრულ და შეუზღუდავ უფლებამოსილება ისარგებლოს პლატფორმით, გამოხატოს თანხმობა წესებზე და პირობებზე, დადოს სამომხმარებლო ხელშეკრულება და შეასრულოს ამ წესებით და პირობებით/სამომხმარებლო ხელშეკრულებით გათვალისწინებული ვალდებულებები;

8.1.4. პლატფორმის საშუალებით შეძენილ პროდუქტს იყენებს მხოლოდ პირადი, არაკომერციული მიზნებისათვის და არ იყენებს სამეწარმეო მიზნებისათვის;

8.1.5. პლატფორმის სარგებლობის/პლატფორმის საშუალებით პროდუქტის შეძენის მიზნით PSP-ისათვის მიწოდებული ნებისმიერი მონაცემი არის უტყუარი, ზუსტი და სრული. PSP-სათვის მიწოდებული მონაცემების ცვლილების შემთხვევაში, მომხმარებელი ვალდებულია დაუყოვნებლივ განაახლოს და მიაწოდოს განახლებული ინფორმაცია PSP-ს;

8.1.6. პლატფორმაზე რეგისტრაციის დროს ან სხვა ოპერაციის შესრულებისას, მომხმარებლის მიერ მითითებული/გამოყენებული პერსონალური მონაცემები არის უშუალოდ მისი პირადი მონაცემები, ეკუთვნის მხოლოდ მას და არ გამოიყენებს სხვა პირის მაიდენტიფიცირებელ მონაცემებს. მომხმარებელი სრულად არის პასუხისმგებელი ამ პერსონალური მონაცემების ნამდვილობაზე და PSP-სთვის გამჟღავნებაზე;

8.1.7. არ გამოიყენებს სახელს, რომელიც შეიძლება იყოს დამამცირებელი, შეურაცხმყოფელი ან უფლებების დამრღვევი ნებისმიერი სხვა პირისათვის;

8.1.8. მომხმარებლის ქმედება არ არის/იქნება მიმართული PSP-ს ან/და ნებისმიერი მესამე პირის/მხარის მოტყუებისაკენ ან შეცდომაში შეყვანისაკენ;

8.1.9. სამომხმარებლო ხელშეკრულების დადების დროს, არ იმყოფება ნარკოტიკული, ალკოჰოლური, ფსიქოტროპული ან/და ტოქსიკური პრეპარატების ზემოქმედების ქვეშ, ასევე, არ იმყოფება შეცდომის, თაღლითობის, ზეწოლის, მუქარისა ან ნებისმიერი მართლსაწინააღმდეგო ქმედების ზემოქმედების ქვეშ და არ წარმოადგენს ძალადობის, მუქარის, მოტყუების, შეცდომაში შეყვანისა ან/და სხვა აკრძალული ქმედების ობიექტს PSP-სა ან სხვა მესამე პირის მხრიდან;

8.1.10. არ მონაწილეობს არც ერთი იურისდიქციის კანონმდებლობით აკრძალულ საქმიანობაში (მათ შორის, ფულის გათეთრება, იარაღით ვაჭრობა, ტერორიზი ან სხვა სახის არამართლზომიერ საქმიანობა);

8.1.11. არ წარმოადგენს პირს, ვისთანაც ფინანსური ტრანზაქციების განხორციელება აკრძალულია ეკონომიკური ან სავაჭრო სანქციებით;

8.1.12. პლატფორმაზე პირადი ანგარიშის გახსნისას, პლატფორმით სარგებლობისას, პლატფორმის საშუალებით პროდუქტის შეძენისას, სამომხმარებლო ხელშეკრულების ან წესებისა და პირობების მოქმედების განმავლობაში მისი საქმიანობა ან/და ქმედება შესაბამისობაში არის/იქნება ადგილობრივ ან/და საერთაშორისო კანონმდებლობასთან;

8.1.13. სარგებლობს/ისარგებლებს პლატფორმით, მათ შორის, პლატფრომის საშუალებით გახორციელებს სამომხმარებლო ხელშეკრულების დადებას/პროდუქტის შეძენას მხოლოდ საკუთარი ნებით, მისი თავისუფალი არჩევნისა და გააზრებული რისკის საფუძველზე, PSP-ისა და სხვა მესამე პირთა იძულებისა და ზეწოლის გარეშე;

8.1.14. არ განახორციელებს ქმედებას, რომელიც იკრძალება საქართველოს კანონმდებლობით, წინამდებარე წესების და პირობებით.

8.2. PSP-ს უფლება გარანტიების დარღვევის შემთხვევაში:

თუ მომხმარებლის მხრიდან დაირღვევა წინამდებარე მუხლით განსაზღვრული ნებისმიერი გარანტია, რაც თავისი ბუნებით წარმოადგენს წესებისა და პირობების/სამომხმარებლო ხელშეკრულების არსებით დარღვევას, PSP უფლებამოსილია, პლატფორმის უსაფრთხოებისა და PSP-ს კანიერი ინტერესების დაცვის მიზნით, დაუყოვნებლივ, ცალმხრივად განახორციელოს შემდეგი ქმედებებიდან ერთ-ერთი ან რამდენიმე ერთობლივად: ა) შეაჩეროს ან შეწყვიტოს კონკრეტული სამომხმარებლო ხელშეკრულების მოქმედება; ბ) უარი თქვას სამომხმარებლო ხელშეკრულებით ნაკისრი ვალდებულებების შესრულებაზე; გ) დროებით შეზღუდოს, შეაჩეროს ან სრულად გააუქმოს მომხმარებლის წვდომა პლატფორმასთან (პირადი ანგარიშის დაბლოკვა ან წაშლა).

9. მომხმარებლის ვალდებულებები

წესებსა და პირობებზე თანხმობის გამოხატვით, მომხმარებელი კისრულობს ვალდებულებას:

9.1. დაიცვას და შეასრულოს წესებითა და პირობებით/სამომხმარებლო ხელშეკრულებით განსაზღვრული მოთხოვნები სრულად, ჯეროვნად და კეთილსინდიერად;

9.2. სამომხმარებლო ხელშეკრულების შესაბამისად სრულად აუნაზღაუროს PSP-ს პლატფორმის საშუალებით შეძენილი პროდუქტის ღირებულება და ასეთის არსებობის შემთხვევაში, მიწოდების ან/და ნებისმიერი სხვა დამატებითი ხარჯი, რაც პროდუქტის შეძენის ან/და მიწოდებისათვის არის დადგენილი პლატფორმაზე;

9.3. არ განახორციელოს ნებისმიერი ისეთი ქმედება, რომელიც აკრძალულია/შეზღუდულია მოქმედი კანონმდებლობით, ამ წესებით და პირობებით ან/და არის უკანონო, დამაბნეველი, დისკრიმინაციული ან თაღლითური ან/და არღვევს ან ლახავს სხვა პირთა უფლებებს;

9.4. დაუყოვნებლივ აცნობოს PSP-ს წერილობით, მათ შორის, ელექტრონულად, ყველა იმ გარემოების შესახებ, რომელიც შეიძლება წინააღმდეგობაში მოვიდეს წესებთან და პირობებთან/ სამომხმარებლო ხელშეკრულებასთან ან/და გამოიწვიოს სამომხმარებლო ხელშეკრულებით ნაკისრი ვალდებულებების დარღვევა;

9.5. პერიოდულად, საჭიროების შესაბამისად, განაახლოს სამომხმარებლო ხელშეკრულების დადების ან/და პლატფორმის სარგებლობის მიზნით, მათ შორის, რეგისტრაციის, ავტორიზაციის, პლატფორმაზე წვდომის ან მისი საშუალებით პროდუქტის შეძენის მიზნით წარდგენილი ნებისმიერი ინფორმაცია, მონაცემები ან დოკუმენტი;

9.6. პროდუქტის გამოყენებამდე სრულად გაეცნოს პლატფორმის საშუალებით შეძენელი პროდუქტის თანხმლებ ინსტრუქციას, ანოტაციას, მოხმარების/სარგებლობის წესებს ან/და პლატფორმაზე განთავსებული პროდუქტის შესახებ ინფორმაციას, პროდუქტის აღწერას, მათ შორის, არსებობის შემთხვევაში, უსაფრთხოების წესებსა და რეკომენდაციებს;

9.7. ცვლილებების, დამატებების ან სიახლეების გაცნობის მიზნით, პერიოდულად გაეცნოს პლატფორმის წესებსა და პირობებს;

9.8. თუ მომხმარებელი პლატფორმაზე ყიდულობს ისეთ პროდუქტს, რომლის რეალიზაციაზე ან ბრუნვაზე დაწესებულია ასაკობრივი ან სხვა ტიპის სამართლებრივი შეზღუდვა, ანდა საჭიროებს დამატებითი დოკუმენტაციის/ინფორმაციის წარმოდგენასა და გადამოწმებას (მაგალითად, ექიმის რეცეპტი), წარმოადგინოს მოთხოვნილი დოკუმენტაცია ან ინფორმაცია. წინააღმდეგ შემთხვევაში, PSP-ს უფლება აქვს ცალმხრივად თქვს უარი სამომხმარებლო ხელშეკრულების შესრულებაზე (სამომხმარებლო ხელშეკრულების გაუქმება/შეწყვეტა).

10. ინფორმაცია პროდუქტის შესახებ

10.1. ინფორმაცია პლატფორმაზე გასაყიდად შემოთავაზებული პროდუქტის შესახებ, მათ შორის, დასახელება, მწარმოებელი და ძირითადი მახასიათებლები, პროდუქტის ფოტო ან/და ვიდეო გამოსახულება, პროდუქტის გამოყენების წესების ან/და სხვა ინფორმაცია წარმოდგენილია პლატფორმაზე, შესაბამისი პროდუქტის აღწერის გვერდებზე.

10.2. PSP ცდილობს სათანადოდ აღწეროს პლატფორმაზე განთავსებული პროდუქტი და ასევე, პროდუქტის ფოტო ან/და ვიდეო გამოსახულებით მაქსიმალურად მიახლოებით ასახოს მისი ფაქტობრივი გარეგნული იერსახე, მათ შორის, პროდუქტის რეალური ფერები, ზომა და სხვა მახასიათებლები/პარამეტრები.

10.3. PSP არ იძლევა გარანტიას და არ არის პასუხისმგებელი პროდუქტის პლატფორმაზე განთავსებული ფოტო ან/და ვიდეო გამოსახულების ფერებსა და მომხმარებლის მიერ მიღებული პროდუქტის რეალურ ფერებს შორის უმნიშვნელო განსხვავებაზე, რომელიც შესაძლოა გამოწვეული იყოს მომხმარებლის კომპიუტერული/ელექტრონული მოწყობილობის ტექნიკური მახასიათებლებით, კონფიგურაციის თავისებურებებით ან სხვა მსგავსი მიზეზებით.

10.4. პლატფორმაზე განთავსებული პროდუქტის ვიზუალურ მახასიათებლებსა და მის ფაქტობრივ გარეგნულ იერსახეს შორის არსებული უმნიშვნელო განსხვავება არ მიიჩნევა პროდუქტის ნაკლად.

10.5. პლატფორმის საშუალებით პროდუქტის შეძენამდე, პროდუქტის თაობაზე დამატებითი ინფორმაციის მისაღებად, მომხმარებელს შეუძლია მიმართოს PSP-ს პლატფორმაზე მითითებულ საკომუნიკაციო არხებზე ან PSP ასისტენტს.

11. ინფორმაცია ფარმაცევტული პროდუქტის შესახებ

11.1. ფარმაცევტული პროდუქტის შესახებ პლატფორმაზე განთავსებული ინფორმაცია/აღწერა განკუთვნილია მხოლოდ საინფორმაციო მიზნებისთვის. ეს ინფორმაცია არ წარმოადგენს სამედიცინო ან კლინიკურ რჩევას და არავითარ შემთხვევაში არ ცვლის კვალიფიციური ექიმის კონსულტაციას ან პროფესიონალურ სამედიცინო მომსახურებას.

11.2. მომხმარებელი არ უნდა დაეყრდნოს ფარმაცევტული პროდუქტის შესახებ პლატფორმაზე განთავსებულ ინფორმაციას მკურნალობასთან დაკავშირებული გადაწყვეტილებების მიღებისას და არ უნდა გამოიყენოს თვითმკურნალობის მიზნით. ნებისმიერი თვითმკურნალობა, რომელიც ეფუძნება პლატფორმაზე არსებულ ინფორმაციას, ხორციელდება მომხმარებლის პირადი და ექსკლუზიური რისკის ქვეშ.

11.3. ფარმაცევტული პროდუქტის ინსტრუქციები და შემადგენლობა შეიძლება განსხვავდებოდეს ქვეყნების მიხედვით. ფარმაცევტული პროდუქტის შესახებ პლატფორმაზე განთავსებული ინფორმაცია შეესაბამება საქართველოს კანონმდებლობას, გამიზნულია საქართველოს ტერიტორიაზე მოქმედებისათვის და PSP არ არის პასუხისმგებელი მის გამოსადეგობაზე ან მისი გამოყენებით მიღებულ შედეგზე საქართველოს ფარგლებს გარეთ.

11.4. !!!გაფრთხილება:

მკურნალობის მიზნით ფარმაცევტული პროდუქტის შეძენამდე, მომხმარებელი აუცილებელია გაეცნოს მის ინსტრუქციას და გაიაროთ კონსულტაცია ექიმთან.

მხოლოდ ექიმს შეუძლია ზუსტად განსაზღვროს მკურნალობისათვის საჭირო დოზირება და მკურნალობის კურსი.

ფარმაცევტული პროდუქტის გვერდითი მოვლენების შესახებ დეტალური ინფორმაციის მისაღებად მომხმარებელმა უნდა მიმართოს ექიმს.

12. პროდუქტის გასაყიდი ფასი

12.1. პროდუქტის გასაყიდი ფასი და, შესაბამის შემთხვევაში, პროდუქტის ერთეულის ფასი, მკაფიოდ და გასაგები ფორმით მითითებულია პლატფორმაზე, მათ შორის, პროდუქტის აღწერის გვერდზე და იდენტიფიცირდება როგორც საბოლოო გასაყიდი ფასი. პროდუქტის ერთეულის ფასის მითითება არ არის აუცილებელი, თუ იგი პროდუქტის გასაყიდი ფასის იდენტურია.

12.2. პროდუქტის გასაყიდი ფასი და შესაბამის შემთხვევაში, პროდუქტის ერთეულის ფასი, პლატფორმაზე მითითებულია საქართველოს ეროვნულ ვალუტაში, ლარში.

პროდუქტის ერთეულის ფასის პლატფორმაზე არ მიეთითება აუცილებელი არ არის, თუ იგი პროდუქტის გასაყიდი ფასის იდენტურია.

12.3. პლატფორმაზე მითითებული პროდუქტის გასაყიდი ფასი და, შესაბამის შემთხვევაში, პროდუქტის ერთეულის ფასი, მოიცავს დამატებული ღირებულების გადასახადსა (დღგ) და ყველა სხვა მოქმედ გადასახადს (არსებობის შემთხვევაში).

12.4. პლატფორმაზე განთავსებული პროდუქტის გასაყიდი ფასი და შესაბამის შემთხვევაში, პროდუქტის ერთეულის ფასი მოქმედებს და ვრცელდება ექსკლუზიურად პლატფორმის საშუალებით დისტანციური სამომხმარებლო ხელშეკრულების დადების შემთხვევებზე.

12.5. პლატფორმაზე განთავსებული პროდუქტის გასაყიდი ფასი და შესაბამის შემთხვევაში, პროდუქტის ერთეულის ფასი მომხმარებელს არ უჩენს ანალოგიური პროდუქტის ფიზიკურ PSP აფთიაქში იმავე პირობებით შეძენის მოთხოვნის უფლებას, და პირიქით - ფიზიკურ PSP-ს აფთიაქში არსებული პროდუქტის გასაყიდი ფასი და შესაბამის შემთხვევაში, პროდუქტის ერთეულის ფასი არ ვრცელდება პლატფორმაზე პროდუქტის შეძენის შემთხვევებზე.

12.6. პლატფორმაზე წარმოდგენილი საფასო აქციები ან ფასდაკლებები შეიძლება განსხვავდებოდეს ფიზიკურ PSP აფთიაქში არსებული შეთავაზებებისგან.

12.7. PSP უზრუნველყოფს, რომ პროდუქტის შეძენის მიზნით სამომხმარებლო ხელშეკრულების დადებამდე (მომხმარებელი წინასწარ იყოს ინფორმირებული პლატფორმაზე გასაყიდად შემოთავაზებული პროდუქტის გასაყიდი ფასის თაობაზე და შესაბამის შემთხვევაში პროდუქტის ერთეულის ფასის თაობაზე.

12.8. გამონაკლის შემთხვევაში, თუ პროდუქტის ბუნებიდან გამომდინარე, მისი გასაყიდი ფასის წინასწარ გამოთვლა შეუძლებელია PSP უზრუნველყოფს, რომ სამომხმარებლო ხელშეკრულების დადებამდე მომხმარებელი წინასწარ იყოს ინფორმირებული პროდუქტის გასაყიდი ფასის გამოთვლის წესის თაობაზე და იმის შესახებ, რომ შესაძლებელია დამატებითი ხარჯები წარმოიშვას.

12.9. პლატფორმის საშუალებით პროდუქტის შეძენისას მომხმარებელი ვალდებულია გადაიხადოს პროდუქტის ის გასაყიდი ფასი, რაც სამოხმარებლო ხელშეკრულების დადების დროისთვის ამ პროდუქტზე იყო მითითებული პლატფორმაზე.

12.10. PSP უფლებამოსილია ნებისმიერ დროს, წინასწარი შეტყობინების გარეშე, საკუთარი შეხედულებისამებრ შეცვალოს (გაზარდოს ან შეამციროს), პლატფორმაზე განთავსებული პროდუქტის გასაყიდი ფასი და შესაბამის შემთხვევაში, პროდუქტის ერთეულის ფასი, შესაბამისი სამომხმარებლო ხელშეკრულების დადებამდე (გადახდა).

12.11. მომხმარებლისათვის ცნობილი უნდა იყოს მომხმარებლის მიერ შეკვეთილი პროდუქტის გასაყიდ ფასს და შესაბამის შემთხვევაში პროდუქტის ერთეულის ფასს შესაძლოა დაემატოს პროდუქტის მიწოდების ღირებულება ან/და სხვა დამატებითი ხარჯები (მათ შორის, მიწოდების, ტრანსპორტირების, გადაგზავნის, გადაზიდვის, საკურიერო მომსახურების, საფოსტო ან სხვა ხარჯი, მომსახურე ბანკის საკომისიო და სხვა), რაც საბოლოოდ ახდენს გავლენას მომხმარებლის მიერ პლატფრომაზე გათავსებული შეკვეთის ჯამური ღირებულების ფორმირებაზე.

აღნიშნულის თაობაზე მომხმარებელი წინასწარ, სამომხმარებლო ხელშეკრულების დადებამდე (გადახდის განხორციელებამდე) მკაფიოდ და გასაგები ფორმით იქნება ინფორმირებული.

13. სამომხმარებლო ხელშეკრულების დადება

13.1. პლატფორმაზე განთავსებული პროდუქტი, მისი ფასი და აღწერილობა წარმოადგენს PSP-ს საჯარო შეთავაზებას (ოფერტს) პროდუქტის შეძენის მიზნით დისტანციურ სამომხმარებლო ხელშეკრულების დადებაზე.PSP უფლებამოსილია, ნებისმიერ დროს შეცვალოს პლატფორმაზე პროდუქტის შესახებ განთავსებული ინფორმაცია ან შეწყვიტოს პროდუქტის რეალიზაცია, რაც ავტომატურად იწვევს შესაბამისი ძველი ოფერტის ძალადაკარგულად გამოცხადებას, გარდა იმ შემთხვევისა, როდესაც მომხმარებელმა უკვე დაადასტურა შესაბამისი ოფერტი და განახორციელა გადახდა.

13.2. დისტანციური სამომხმარებლო ხელშეკრულება მხარეებს შორის დადებულად და სამართლებრივად ძალაში შესულად ითვლება მომხმარებლის მიერ პლატფორმაზე „გადახდის“ ღილაკზე დაჭერისა და თანხის PSP-ს საბანკო ანგარიშზე წარმატებით ასახვის მომენტიდან (აქცეპტი). ღილაკზე „გადახდა“ დაჭერით მომხმარებელი ადასტურებს, რომ იგი გაეცნო და ეთანხმება PSP-ს საჯარო შეთავაზებას (ოფერტს).

13.3. დისტანციური სამომხმარებლო ხელშეკრულება მოქმედებს მხარეთა მიერ ამ სამომხმარებლო ხელშეკრულებით ნაკისრი ვალდებულებების სრულად და ჯეროვნად შესრულებამდე.

13.4. მხარეებს შორის დისტანციური სამომხმარებლო ხელშეკრულების დადებისთანავე წინამდებარე წესები და პირობები ხდება ამ სამომხმარებლო ხელშეკრულების განუყოფელი და არსებითი ნაწილი. მხარეთა უფლებები და ვალდებულებები კონკრეტული სამომხმარებლო ხელშეკრულების ფარგლებში განისაზღვრება გადახდის განხორციელების მომენტში მოქმედი წესებია და პირობების ვერსიის შესაბამისად.

13.5. წესებსა და პირობებსა და უშუალოდ პლატფორმაზე კონკრეტული პროდუქტის შეძენისას დადებულ სამომხმარებლო ხელშეკრულების პირობებს შორის შეუსაბამობის ან წინააღმდეგობის არსებობისას, უპირატესობა ენიჭება სამომხმარებლო ხელშეკრულების პირობებს (გარდა იმ შემთხვევისა, როდესაც აღნიშნული შეუსაბამობა ან წინააღმდეგობა გამოწვეულია პლატფორმის აშკარა ტექნიკური ხარვეზით ან პროგრამული შეცდომით).

14. პროდუქტის შეძენის პროცესი

14.1. პლატფორმაზე პროდუქტის შეძენამდე მომხმარებელმა უნდა გაიაროს რეგისტრაცია და ავტორიზაცია, პლატფორმაზე მოქმედი /დადგენილი პირობების შესაბამისად.

14.2. პლატფორმაზე პროდუქტის შეძენის პროცესი მოიცავს რამდენიმე ეტაპს, მათ შორის, მომხმარებლის მიერ სასურველი პროდუქტის შერჩევასა და ვირტუალურ კალათაში დამატებას, პროდუქტის მიწოდების მეთოდის შერჩევას, ანგარიშსწორების (გადახდის) სასურველი მეთოდის შერჩევას, გადახდას.

14.3. პლატფორმაზე გადახდის განხორციელებით (ღილაკზე ,,გადახდა’’ დაჭერა) მომხმარებელი გამოხატავს თანხმობას (აქცეპტს) შესაბამის სამომხმარებლო ხელშეკრულების დადებაზე და მომხმარებლისათვის წარმოშობს ამ სამომხმარებლო ხელშეკრულებით გათვალისწინებული პროდუქტის/შეკვეთის ღირებულების გადახდის ვალდებულებას.

14.4. პლატფორმაზე გადახდის განხორციელებამდე (ღილაკზე ,,გადახდა’’ დაჭერამდე) მომხმარებელი ვალდებულია ყურადღებით გადაამოწმოს პლატფორმაზე მისი ვირტუალური კალათის შინაარსი, პროდუქტი, მისი რაოდენობა, მიწოდების და ანგარიშსწორების მეთოდი ან/და სამომხმარებლო ხელშეკრულების სხვა არსებითი პირობები. მომხმარებლის მხრიდან პლატფორმაზე საკონტაქტო ან მიწოდების მონაცემების (მათ შორის, მიწოდების მისამართი, ტელეფონის ნომერი) არასწორი ან არასრული მითითების შემთხვევაში, პასუხისმგებლობა პროდუქტის მიწოდების შეფერხებაზე, დაგვიანებაზე ან შეუძლებლობაზე სრულად ეკისრება მომხმარებელს.

14.5. მომხმარებლის მიერ არჩეული პროდუქტის პლატფორმის ვირტუალურ კალათაში დამატება არ წარმოადგენს ამ პროდუქტის დაჯავშნის საფუძველს და არ იძლევა მარაგის ხელმისაწვდომობის გარანტიას.

15. ანგარიშსწორების პირობები

15.1. სამომხმარებლო ხელშეკრულება PSP-სთვის სავალდებულოდ შესასრულებლად მიიჩნევა მხოლოდ მას შემდეგ, რაც მომხმარებელი სრულად გადაიხდის პროდუქტის ღირებულებას (მიწოდების ან სხვა დამატებითი ხარჯების ჩათვლით) და აღნიშნული თანხა აისახება PSP-ს საბანკო ანგარიშზე, საგადახდო ტრანზაქციის წარმატებული ავტორიზაციის გზით.

15.2. პლატფორმაზე ანგარიშსწორების მიზნით მომხმარებელი პლატფორმიდან ავტომატურად გადამისამართდება შესაბამისი გადახდის მომსახურების პროვაიდერის (ბანკის) დაცულ გვერდზე. ანგარიშსწორება ხორციელდება დაცული/დაშიფრული ტექნოლოგიური პროტოკოლების/არხების მეშვეობით. PSP არ ინახავს, არ ამუშავებს და არ გააჩნია ტექნიკური წვდომა მომხმარებლის საბანკო ბარათის საიდენტიფიკაციო მონაცემებთან.

15.3. ნებისმიერი საფუძვლით სამომხმარებლო ხელშეკრულების (შეკვეთის) გაუქმების შემთხვევაში, PSP-ს მხრიდან მომხმარებლისათვის თანხის დაბრუნება ხორციელდება იმავე საგადახდო საშუალების გამოყენებით, რომლითაც მომხმარებელმა თავდაპირველად განახორციელა ანგარიშსწორება, გარდა იმ შემთხვევისა, როდესაც მომხმარებელი მკაფიოდ დათანხმდა სხვა საგადახდო საშუალების გამოყენებაზე და ამავდროულად მას დამატებითი ხარჯი არ წარმოეშობა.

16. გადახდის მეთოდები

16.1. მომხმარებელი უფლებამოსილია სამომხმარებლო ხელშეკრულების დადებამდე, გადახდის გვერდზე გაეცნოს და შეარჩიოს მისთვის სასურველი ერთ-ერთი გადახდის მეთოდი:

ა)საბანკო ბარათი (

ბ)Apple Pay;

გ) თიბისი ბანკის საბანკო პროდუქტი ,,განაწილება’’;

დ) საქართველოს ბანკის საბანკო პროდუქტი ,,ნაწილ-ნაწილ’’;

ე)პლატფორმაზე კონკრეტული მომენტისთვის ხელმისაწვდომი ნებისმიერი სხვა ალტერნატიული გადახდის მეთოდი.

16.2. ანგარიშსწორების გვერდზე მომხმარებლისთვის ხილვადი იქნება მხოლოდ ის მეთოდები, რომლებიც მოცემულ მომენტში პლატფრომაზე არის ხელმისწვდომი და აქტიური.

16.3. PSP უფლებამოსილია, ნებისმიერ დროს, წინასწარი შეტყობინების გარეშე, საკუთარი შეხედულებისამებრ შეცვალოს, დაამატოს ან გააუქმოს ნებისმიერი საგადახდო ინსტრუმენტი/გადახდის მეთოდი, შესაბამისი სამომხმარებლო ხელშეკრულების დადებამდე (გადახდა).

16.4. საბანკო ბარათი:

  • პლატფორმაზე ანგარიშსწორება ხორციელდება ნებისმიერი ქვეყნისა და ნებისმიერი ლიცენზირებული საბანკო დაწესებულების Visa და Mastercard ტიპის სადებეტო ან საკრედიტო, პლასტიკური ან ციფრული ბარათით (შემდგომში - საბანკო ბარათი)

  • პლატფორმაზე ანგარიშსწორება წარმოებს სს „თიბისი ბანკისა“ და სს „საქართველოს ბანკის“ საგადახდო სისტემების საშუალებით.

  • პლატფორმაზე საბანკო ბარათით გადახდას PSP-ს მხრიდან არ ერიცხება დამატებითი საკომისიო -მომხმარებელი იხდის ზუსტად იმ თანხას, რაც შეადგენს პროდუქტის ჯამურ ღირებულებას.

  • პლატფორმაზე პროდუქტის შეძენისას, გადახდის გვერდზე საბანკო ბარათის დეტალების მითითებით მომხმარებელი ადასტურებს, რომ ის მართლზომიერად ფლობს აღნიშნულ საბანკო ბარათს, ბარათი პირადად მას ეკუთვნის (ან გააჩნია მისი გამოყენების კანონიერი უფლებამოსილება) და ადგილი არ აქვს ბარათის არამართლზომიერ გამოყენებას.

  • მომხმარებელი ვალდებულია სრულად და სწორად შეავსოს გადახდის გვერდზე ანგარიშსწორებისათვის მოთხოვნილი ყველა სავალდებულო ველი, წინააღმდეგ შემთხვევაში საგადახდო ოპერაცია არ განხორციელდება.

  • პლატფორმაზე გადახდის გვერდზე მომხმარებლის მიერ საბანკო ბარათის მონაცების შევსებისა და გადახდის დასტურის შემდეგ, აღნიშნულ საბანკო ბარათთან დაკავშირებული საბანკო ანგარიშიდან მოხდება შესაბამისი პროდუქტის/შეკვეთის ჯამური ღირებულების ავტომატური და სრული ჩამოჭრა ანგარიშიდან,

  • პლატფორმაზე ანგარიშსწორების განხორციელების მიზნით, მომხმარებელმა საგადახდო სისტემას უნდა წარუდგინოს მოქმედი საბანკო ბარათის შესახებ ინფორმაცია.

  • PSP არ ინახავს და არ ფლობს ინფორმაციას ან დოკუმენტაციას მომხმარებლის საბანკო ბარათის სრული მონაცემებისა და საგადახდო ოპერაციის დეტალების შესახებ, ვინაიდან საგადახდო ოპერაციას სრულად ახორციელებს დამოუკიდებელი მესამე პირი - გადახდის მომსახურების პროვაიდერი (ლიცენზირებული ბანკი).

    16.5. Apple Pay:

Apple Pay საგადახდო სისტემა საშუალებას აძლევს მომხმარებელს მოახდინოს პლატფორმაზე ანგარიშსწორება საკუთარ Apple მოწყობილობაში (iPhone, Apple Watch, iPad, Mac ან სხვა) არსებულ Apple Wallet-ში დამატებული საბანკო ბარათის საშუალებით, ფიზიკური ბარათის მონაცემების ხელახალი შეყვანის გარეშე.

16.6. საბანკო პროდუქტები - „განაწილება“ და „ნაწილ-ნაწილ“

  • თუ მომხმარებელს სურს პროდუქტის შეძენისას ისარგებლოს პარტნიორი საბანკო დაწესებულებების საგადახდო ინსტრუმენტებით (სს „თიბისი ბანკის“ პროდუქტი - „განაწილება“ ან სს „საქართველოს ბანკის“ პროდუქტი - „ნაწილ-ნაწილ“), ანგარიშსწორება განხორციელდება უშუალოდ შესაბამისი ბანკის მიერ დადგენილი წესების, ლიმიტებისა და წინაპირობების შესაბამისად.

  • მითითებული საბანკო პროდუქტებით სარგებლობის მინიმალური ან მაქსიმალური ფინანსური ლიმიტები, თანხის გაყოფის პერიოდულობა, საპროცენტო განაკვეთი (ასეთის არსებობის შემთხვევაში) და სხვა საკონტრაქტო პირობები სრულად რეგულირდება მომხმარებელსა და შესაბამის ბანკს შორის არსებული სამართლებრივი ურთიერთობით.

  • PSP არ არის პასუხისმგებელი ბანკების მიერ დასახელებული საგადახდო პირობების ან ლიმიტების ცალმხრივ ცვლილებაზე, ასევე , მომხმარებლისთვის აღნიშნული მომსახურების გაწევაზე ბანკის მხრიდან უარის თქმასა თუ საგადახდო სისტემის ტექნიკურ ხარვეზებზე.

17. მიწოდების მეთოდები

17.1. პლატფორმის საშუალებით შეძენილი პროდუქტის მიწოდებას PSP ახორციელებს ერთ-ერთი შემდეგი მეთოდით, რომელსაც მომხმარებელი ირჩევს პროდუქტის შეძენისას (სამომხმარებლო ხელშეკრულების დადებისას), პლატფორმაზე ამ დროისათვის ხელმისაწვდომი მეთოდებიდან. მიწოდების მეთოდები შესაძლოა მოიცავდეს (მაგრამ არ შემოიფარგლება):

ა) ადგილზე მიწოდება (მითითებულ მისამართზე);

ბ) აფთიაქიდან გატანა;

გ) ლოქერიდან გატანა;

დ) პლატფორმაზე კონკრეტული მომენტისთვის ხელმისაწვდომი ნებისმიერი სხვა ალტერნატიული მიწოდების მეთოდი.

17.2. მიწოდების მეთოდებით სარგებლობის დეტალური პირობები, ასევე, კონკრეტული მეთოდის სპეციფიკიდან გამომდინარე მიწოდების ტერიტორიული დაფარვის არეალი, დრო და ღირებულება, განისაზღვრება პლატფორმაზე, ცალკეულ გვერდზე განთავსებული „მიწოდების პირობების“ (შემდგომში - მიწოდების პირობები) შესაბამისად, რომელიც განთავსებულია პლატფორმაზე (იხ. ბმული: https://psp.ge/delivery-terms ).

მიწოდების პირობები წარმოადგენს წინამდებარე წესებისა და პირობების დანართს, მის განუყოფელ ნაწილს, მოქმედებს მასთან ერთობლიობაში და სრულად სავალდებულოა მომხმარებლისთვის.

თითოეული მეთოდით სარგებლობის წესი და პირობები რეგულირდება წინამდებარე ხელშეკრულებითა და არსებობის შემთხვევაში, პლატფორმაზე განთავსებული დამატებითი პირობებით.

17.3. PSP უფლებამოსილია, ნებისმიერ დროს, წინასწარი შეტყობინების გარეშე, საკუთარი შეხედულებისამებრ შეიტანოს ცვლილებები „მიწოდების პირობებში“ (მათ შორის, დაამატოს, შეცვალოს ან გააუქმოს მიწოდების მეთოდები, მიწოდების არეალი, ვადები ან მომსახურების ფასი). აღნიშნული ცვლილებები ძალაში შედის პლატფორმაზე განთავსების მომენტიდან, ვრცელდება მხოლოდ მისი განთავსების შემდგომ წარმოშობილ ურთიერთობებზე და გავლენას არ ახდენს მის განთავსებამდე დადებულ სამომხმარებლო ხელშეკრულებებზე.

17.4. მომხმარებლისათვის პლატფორმის საშუალებით შეძენილი პროდუქტის ადგილზე მიწოდება შეიძლება განხორციელდეს უშუალოდ PSP-ს მიერ ან საკურიერო მომსახურების გამწევი კონტრაქტორი მესამე პირების საშუალებით.

18. მიწოდების ღირებულება

18.1. მისამართზე/ადგილზე მიწოდების მეთოდის ღირებულება განისაზღვრება მიწოდების პირობების შესაბამისად. პროდუქტის მიწოდების ღირებულებას სრულად ანაზღაურებს მომხმარებელი წესებითა და პირობებით განსზღვრული წესით, თუ სხვა რამ პირდაპირ არ არის გათვალისწინებული PSP-ს მიერ დადგენილი მიწოდების პირობებით ან წინამდებარე წესებითა და პირობებით.

18.2. მიწოდების მეთოდები „აფთიაქიდან გატანა“ და ,,ლოქერიდან გატანა“ მომხმარებლისთვის მიწოდება უფასოა.

18.3. PSP უფლებამოსილია, ნებისმიერ დროს, წინასწარი შეტყობინების გარეშე, საკუთარი შეხედულებისამებრ შეცვალოს შეცვალოს (გაზარდოს ან შეამციროს), დააწესოს ან გააუქმოს პროდუქტის მიწოდების ღირებულება სამომხმარებლო ხელშეკრულების დადებამდე (გადახდამდე).

19. მიწოდების ვადა

19.1. PSP-ს არ დაეკისრება პასუხისმგებლობა პროდუქტის მიწოდების ვადის დარღვევისათვის, თუ მიწოდების დაგვიანება, მიუწოდებლობა ან სამომხმარებლო ხელშეკრულების გაუქმება გამოწვეულია მისგან დამოუკიდებელი ობიექტური გარემოებებით. ასეთ გარემოებებს მიეკუთვნება:

ა) დაუძლეველი ძალა (ფორს-მაჟორი);

ბ) მომხმარებლის მიერ არასწორი, უზუსტო ან არასრული მისამართის ან საკონტაქტო ინფორმაციის მითითება;

გ) მიწოდების განხორციელებისას მომხმარებლის მითითებულ ადგილზე არყოფნა ან მასთან სატელეფონო კომუნიკაციის დამყარების შეუძლებლობა.

19.2. პროდუქტის ადგილზე მიწოდების ვადის დარღვევისას, მომხმარებელმა PSP-ს უნდა განუსაზღვროს გონივრული დამატებითი ვადა ვალდებულების შესასრულებლად, პლატფორმაზე მითითებულ ოფიციალურ ელექტრონულ ფოსტაზე შეტყობინების გაგზავნის გზით. დამატებითი ვადის უშედეგოდ გასვლის შემთხვევაში, მომხმარებელს უფლება აქვს უარი თქვას სამომხმარებლო ხელშეკრულებაზე და მოითხოვოს ზიანის ანაზღაურება კანონმდებლობით დადგენილი წესით. მომხმარებლის მიერ დამატებითი ვადის განსაზღვრა სავალდებულო არ არის, თუ აშკარაა, რომ ამას არავითარი შედეგი არ ექნება, ან თუ მომხმარებელმა ხელშეკრულების შესრულება პირდაპირ დაუკავშირა პროდუქტის მხოლოდ დროულად მიღებას.

19.3. თუ პროდუქტის შეძენის, გაცემის, მიღების, შენახვის ან ტრანსპორტირებისათვის კანონმდებლობით დადგენილია სპეციალური სამართლებრივი წესი (მათ შორის, სპეციალური რეცეპტის ან დოკუმენტაციის წარმოდგენის მოთხოვნა), ან პროდუქტის გაბარიტების, წონის ან მოცულობის გამო ტექნიკურად შეუძლებელია მომხმარებლის მიერ შერჩეული მიწოდების მეთოდის გამოყენება, PSP უფლებამოსილია, ობიექტური სამართლებრივი ან ტექნიკური აუცილებლობისას, შეზღუდოს ან დაბლოკოს მიწოდების კონკრეტული მეთოდის არჩევის შესაძლებლობა ან უარი თქვას პროდუქტის შერჩეული მეთოდით მიწოდებაზე. ასეთ შემთხვევაში PSP გაჭიაურების გარეშე უკავშირდება მომხმარებელს და უთანხმდება პროდუქტის მიწოდების ალტერნატიულ მეთოდზე, ხოლო შეთანხმების მიუღწევლობისას სამომხმარებლო ხელშეკრულება გაუქმდება და მომხმარებელს სრულად დაუბრუნდება პროდუქტში გადახდილი თანხა.

20. მიწოდების დამატებითი ხარჯები

20.1. PSP უზრუნველყოფს, რომ სამომხმარებლო ხელშეკრულებით გათვალისწინებული ძირითადი ვალდებულების შესრულებისთვის დადგენილი პროდუქტის ფასის გარდა, ყველა დამატებითი ხარჯის (მათ შორის, მიწოდების, ტრანსპორტირების, გადაგზავნის, საკურიერო მომსახურების ან საფოსტო ხარჯის) თაობაზე მომხმარებელი ინფორმირებული იყოს წინასწარ, სამომხმარებლო ხელშეკრულების დადებამდე (გადახდამდე). თუ აღნიშნული დამატებითი ხარჯების ოდენობის წინასწარ ზუსტი გაანგარიშება ობიექტურად შეუძლებელია, მომხმარებელს მიეწოდება ინფორმაცია მათი გამოთვლის წესის თაობაზე და იმის შესახებ, რომ შესაძლოა აღნიშნული დამატებითი ხარჯები წარმოიშვას.

20.2. თუ დამატებითი ხარჯების ანაზღაურებაზე PSP-ს მომხმარებლისგან მკაფიოდ გამოხატული წინასწარი თანხმობა არ მიუღია, მომხმარებელს უფლება აქვს მოითხოვოს დამატებით გადახდილი თანხის უკან დაბრუნება. მომხმარებლის მიერ პროდუქტის ჯამური ღირებულების გადახდა (ღილაკზე „გადახდა“ დაჭერა) მას შემდეგ, რაც მან თავად აირჩია და მონიშნა მიწოდების სასურველი მეთოდი და გაეცნო მის ტარიფს, მიიჩნევა მკაფიოდ გამოხატულ თანხმობად.

20.3. PSP უზრუნველყოფს, რომ პროდუქტის ღირებულების გადახდისას, კონკრეტული საგადახდო ინსტრუმენტის (საბანკო ბარათის) გამოყენებისთვის მომხმარებელს იმაზე მეტი საფასური ან საკომისიო არ გადაახდევინოს, ვიდრე თავად PSP-ს ეკისრება შესაბამისი მომსახურე პროვაიდერის (ბანკის) მიერ ამგვარი ინსტრუმენტის მომსახურებისათვის.

20.4. PSP-სთან პლატფორმაზე მითითებულ საკონტაქტო ტელეფონის ნომერზე დასაკავშირებლად ან დისტანციური კომუნიკაციის სხვა საშუალებების გამოყენებისათვის მომხმარებელს PSP-ს სასარგებლოდ არ დაეკისრება რაიმე დამატებითი საფასური ან სტანდარტულ საბაზისო ტარიფზე მეტი. აღნიშნული პირობა არ გამორიცხავს სატელეკომუნიკაციო მომსახურების გამწევი კომპანიების უფლებას, დააწესონ სტანდარტული საფასური სატელეფონო კავშირისა თუ ინტერნეტმომსახურების გაწევისთვის.

20.5. ინტერნეტკავშირის მქონე ნებისმიერი პირისათვის PSP-ს ელექტრონული პლატფორმით სარგებლობა და წვდომა არის სრულად უფასო.

21. ადგილზე მიწოდების წესი

21.1. პლატფორმის საშუალებით შეძენილი პროდუქტის ადგილზე მიწოდება წარმოადგენს მიწოდების მეთოდს, რომლის დროსაც პროდუქტის ტრანსპორტირება ხორციელდება მომხმარებლის არჩევნის შესაბამისად, მის პირად ანგარიშში რეგისტრირებულ მისამართზე ან კონკრეტული სამომხმარებლო ხელშეკრულების დადების დროს მითითებულ მისამართზე (შემდგომში - მიწოდების ადგილი).

21.2. პროდუქტის მიმღები პირი შეიძლება იყოს თავად მომხმარებელი ან მის მიერ მითითებული მესამე პირი. პროდუქტის მიმღები პირი უნდა იყოს 18 წლის ასაკს მიღწეული, სრული ქმედუნარიანობის მქონე ფიზიკური პირი, რომელსაც მომხმარებლის მიერ მითითებულ მისამართზე PSP ან კურიერი ფაქტობრივად გადასცემს შეძენილ პროდუქტს.

21.3. თუ შეძენილ პროდუქტი უნდა ჩაიბაროს მესამე პირმა, მომხმარებელი ვალდებულია PSP-ს წინასწარ მიაწოდოს ამ პირის საიდენტიფიკაციო მონაცემები: სახელი, გვარი და საკონტაქტო ტელეფონის ნომერი, რათა PSP-მ მოახდინოს პროდუქტის მიმღები პირის იდენტიფიცირება, პროდუქტის უსაფრთხო ჩაბარება და საჭიროების შემთხვევაში მასთან კომუნიკაცია.

21.4. პროდუქტის მიმღები პირის იდენტიფიცირების ან სრულწლოვანების გადამოწმების მიზნით, PSP ან მიწოდების განმსახორციელებელი კურიერი უფლებამოსილია მიწოდების ადგილზე მიმღებ პირს მოსთხოვოს პირადობის დამადასტურებელი დოკუმენტის (პასპორტის) წარმოდგენა. წინააღმდეგ შემთხვევაში, PSP უფლებამოსილია არ გადასცეს პროდუქტი ასეთ პირს. აღნიშნულ შემთხვევაში, პროდუქტის ადგილზე მიწოდების შეუძლებლობა მიიჩნევა მომხმარებლის ბრალეული ქმედებით გამოწვეულ გარემოებად და მომხმარებლის მიერ შეძენილი პროდუქტი ბრუნდება შესაბამის PSP აფთიაქში.

21.5. მომხმარებელი ვალდებულია უზრუნველყოს ადგილზე (მისამართზე) მიწოდებული პროდუქტის მიღება და PSP-სთან ან კურიერთან კომუნიკაციის შესაძლებლობა იმ ტელეფონის ნომერზე, რომელიც მითითებულია პლატფორმაზე მის პირად ანგარიშში ან კონკრეტული სამომხმარებლო ხელშეკრულების დადებისათვის.

21.6. PSP-ს მიერ სამომხმარებლო ხელშეკრულებით ნაკისრი ვალდებულება შესრულებულად, ხოლო პლატფორმის საშუალებით შეძენილი პროდუქტი ჩაბარებულად ითვლება იმ მომენტიდან, როდესაც PSP ან კურიერი მიწოდების ადგილზე ფაქტობრივად გადასცემს პროდუქტს მომხმარებელს ან მის მიერ მითითებულ მესამე პირს.

21.7. თუ ადგილზე მიწოდებისას მომხმარებელი ან მის მიერ მითითებული მესამე პირი არ გამოცხადდება მიწოდების ადგილზე, ან პროდუქტის მიმღებთან დაკავშირება შეუძლებელია (მითითებულ ტელეფონის ნომერზე დაკავშირების გონივრული რაოდენობის მცდელობებისა მიუხედავად), სამომხმარებლო ხელშეკრულება მიიჩნევა მომხმარებლის ბრალეული ქმედებით ჩაუბარებლად და PSP-ს არ ეკისრება პასუხისმგებლობა მიწოდების ვადის დარღვევაზე, დაგვიანებაზე ან ვალდებულების არაჯეროვან შესრულებაზე.

21.8. მომხმარებლის ბრალეული ქმედებით პროდუქტის ჩაუბარებლობის შემთხვევაში, პროდუქტი ბრუნდება ფიზიკურ PSP აფთიაქში, რის შესახებაც მომხმარებელს ეცნობება მოკლე ტექსტური შეტყობინების (SMS) ან ელექტრონული ფოსტის საშუალებით. მომხმარებლის პროდუქტი ბრუნდება და უსასყიდლოდ ინახება PSP აფთიაქში, დაბრუნებიდან მომდევნო 7 (შვიდი) კალენდარული დღის განმავლობაში (იმ აფთიაქის მისამართი და სამუშაო საათები,სადაც ინახება პროდუქტი მომხმარებელს ეცნობება).

21.9. მომხმარებელი ვალდებულია PSP აფთიაქში პროდუქტის დაბრუნებიდან მომდევნო 7 (შვიდი) კალენდარული დღის განმავლობაში გაიტანოს პროდუქტი შესაბამისი PSP აფთიაქიდან. წინააღმდეგ შემთხვევაში, სამომხმარებლო ხელშეკრულება (შეკვეთა) გაუქმდება PSP-ს მიერ და მომხმარებელს დაუბრუნდება გადახდილი თანხა წინამდებარე წესებით განსაზღვრული პირობების შესაბამისად, რასაც გამოაკლდება მიწოდების (საკურიერო) მომსახურებაზე გაწეული ფაქტობრივი ხარჯები.

22. აფთიაქიდან გატანის წესი

22.1. „აფთიაქიდან გატანა“ წარმოადგენს წარმოადგენს პროდუქტის მიწოდების მეთოდს, რომლის დროსაც პლატფორმის საშუალებით შეძენილი პროდუქტის გაცემა ხორციელდება მომხმარებლის მიერ პროდუქტის შეძენისას წინასწარ შერჩეულ მისამართზე მდებარე ფიზიკურ PSP აფთიაქიდან.

22.2. პლატფორმის საშუალებით შეძენილი პროდუქტის აფთიაქიდან გატანა მომხმარებლისთვის არის სრულად უფასო.

22.3. მომხმარებელი პროდუქტის გატანის მზადყოფნის შესახებ იღებს შესაბამის შეტყობინებას. პროდუქტის მიღება შესაძლებელია მომხმარებლის მიერ შერჩეულ აფთიაქში, პროდუქტის გამზადების თაობაზე შეტყობინების მიღებიდან 30 (ოცდაათი) წუთის გასვლის შემდეგ, შესაბამისი აფთიაქის სამუშაო საათების განმავლობაში, რომლის შესახებ ინფორმაციაც მომხმარებელს წინასწარ მიეწოდება პლატფორმაზე.

22.4. პროდუქტის მისაღებად მომხმარებელი აფთიაქში წარადგენს ამ შეკვეთისათის დაგენერირებულ უნიკალურ ნომერს ან ვერიფიკაციის კოდს (მიღებულს პლატფორმაზე ან მოკლე ტექსტური შეტყობინების სახით). PSP-ს უფლებამოსილი პირი უზრუნველყოფს აფთიაქიდან პროდუქტის გაცემას აღნიშნული უნიკალური ნომრის ან ვერიფიკაციის კოდის საგადახდო სისტემაში შემოწმების საფუძველზე.

22.5. მომხმარებელი ვალდებულია უსაფრთხოდ შეინახოს და არ გაუმჟღავნოს მესამე პირებს შეძენილი პროდუქტის შესაბამისი უნიკალური ნომერი ან ვერიფიკაციის კოდი. PSP უფლებამოსილია, აღნიშნული მონაცემების წარმდგენი ნებისმიერი პირი მიიჩნიოს მომხმარებლის მიერ უფლებამოსილ მიმღებად. PSP არ იღებს პასუხისმგებლობას იმ ზიანზე, რომელიც შესაძლოა წარმოეშვას მომხმარებელს მითითებული უნიკალური მონაცემების მესამე პირისთვის გამჟღავნების შედეგად.

22.6. პროდუქტის ფაქტობრივ მიღებამდე მომხმარებელი (ან მიმღები პირი) ვალდებულია გარეგანი დათვალიერებით შეამოწმოს პროდუქტი, მათ შორის, მისი მთლიანობა, შეფუთვა და რაოდენობა. რაიმე სახის ნაკლის აღმოჩენის შემთხვევაში, პრეტენზია უნდა დაფიქსირდეს აფთიაქში დაუყოვნებლივ, სანამ პროდუქტი დატოვებს PSP აფთიაქის ტერიტორიას. წინააღმდეგ შემთხვევაში, პრეტენზიები პროდუქტის გარეგან ნაკლზე (მათ შორის, პროდუქტის დასახელების, რაოდენობის, დოზის შესახებ) აღარ მიიღება.

22.7. PSP-ს სამომხმარებლო ხელშეკრულებით ნაკისრი ვალდებულება შესრულებულად, ხოლო პლატფორმის საშუალებით შეძენილი პროდუქტი ჩაბარებულად ითვლება PSP აფთიაქის მიერ პროდუქტის მომხმარებლისთვის ან მისი მიმღები პირისთვის ფაქტობრივად გადაცემის მომენტიდან.

22.8. მომხმარებელი ვალდებულია პროდუქტის გამზადების თაობაზე შეტყობინების მიღებიდან მომდევნო 7 (შვიდი) კალენდარული დღის განმავლობაში გაიტანოს პროდუქტი შესაბამისი PSP აფთიაქიდან. წინააღმდეგ შემთხვევაში, სამომხმარებლო ხელშეკრულება (შეკვეთა) გაუქმდება PSP-ს მიერ და მომხმარებელს დაუბრუნდება გადახდილი თანხა წინამდებარე წესებით განსაზღვრული პირობების შესაბამისად, რასაც გამოაკლდება მიწოდების (საკურიერო) მომსახურებაზე გაწეული ფაქტობრივი ხარჯები (ასეთის არსებობის შემთხვევაში).

23. ლოქერიდან გატანის წესი

23.1. „ლოქერიდან გატანა“ წარმოადგენს პროდუქტის მიწოდების მეთოდს, რომლის დროსაც პლატფორმის საშუალებით შეძენილი პროდუქტის გაცემა ხორციელდება მომხმარებლის მიერ პროდუქტის შეძენისას წინასწარ შერჩეულ მისამართზე მდებარე ლოქერიდან (ავტომატიზებული თვითმომსახურების ტერმინალიდან).

23.2. პლატფორმის საშუალებით შეძენილი პროდუქტის ლოქერიდან გატანა მომხმარებლისთვის არის სრულად უფასო.

23.3. მომხმარებელი პროდუქტის გამზადების შესახებ იღებს შეტყობინებას, რომელიც შეიცავს ლოქერის კონკრეტული უჯრის გასაღებად საჭირო უნიკალურ კოდს. პროდუქტის მიღება შესაძლებელია მომხმარებლის მიერ შერჩეულ ლოქერში, შეტყობინების მიღებიდან 30 (ოცდაათი) წუთის გასვლის შემდეგ, შესაბამისი ლოქერის განთავსების ობიექტის სამუშაო საათების ფარგლებში, რომლის შესახებ ინფორმაციაც მომხმარებელს წინასწარ მიეწოდება.

23.4. პროდუქტის მისაღებად მომხმარებელი ლოქერის ეკრანზე უთითებს პლატფორმის მიერ მინიჭებულ უნიკალურ კოდს. PSP უზრუნველყოფს ლოქერის უჯრის ავტომატურ გაღებას და პროდუქტის ხელმისაწვდომობას აღნიშნული კოდის სისტემური ვერიფიკაციის საფუძველზე.

23.5. მომხმარებელი ვალდებულია საიდუმლოდ შეინახოს და არ გაუმჟღავნოს სხვა მესამე პირებს ლოქერის უნიკალური ვერიფიკაციის კოდი. PSP უფლებამოსილია, ვერიფიკაციის კოდის წარმდგენი ნებისმიერი პირი ჩათვალოს მომხმარებლის მიერ უფლებამოსილ მიმღებად და არ არის პასუხისმგებელი იმ ზიანზე, რომელიც შესაძლოა წარმოეშვას მომხმარებელს კოდის მესამე პირისთვის გამჟღავნების შედეგად.

23.6. ლოქერის უჯრის გაღებისთანავე, მომხმარებელი ვალდებულია ადგილზევე, ლოქერის ტერიტორიის დატოვებამდე, გარეგანი დათვალიერებით შეამოწმოს პროდუქტი. რაიმე სახის გარეგანი ნაკლის ან შეუსაბამობის აღმოჩენის შემთხვევაში, პრეტენზია მომხმარებლის მიერ უნდა დაფიქსირდეს დაუყოვნებლივ, ლოქერის ტერიტორიის დატოვებამდე, PSP-ს ქოლ-ცენტრში დარეკვის ან პლატფორმაზე შესაბამისი შეტყობინების გაგზავნის გზით. წინააღმდეგ შემთხვევაში, პრეტენზიები პროდუქტის გარეგან ნაკლოვანებებზე აღარ მიიღება.

23.7. PSP-ს სამომხმარებლო ხელშეკრულებით ნაკისრ ვალდებულება შესრულებულად, ხოლო პლატფორმის საშუალებით შეძენილი პროდუქტი ჩაბარებულად ითვლება ლოქერის უჯრის გაღებისა და პროდუქტის მომხმარებლის (ან მიმღები პირის) მიერ უჯრიდან ფაქტობრივად ამოღების მომენტიდან.

23.8. მომხმარებელი ვალდებულია პროდუქტის გამზადების თაობაზე შეტყობინების მიღებიდან მომდევნო 7 (შვიდი) კალენდარული დღის განმავლობაში გაიტანოს პროდუქტი შესაბამისი ლოქერიდან. წინააღმდეგ შემთხვევაში, სამომხმარებლო ხელშეკრულება (შეკვეთა) გაუქმდება PSP-ს მიერ და მომხმარებელს დაუბრუნდება გადახდილი თანხა წინამდებარე წესებით განსაზღვრული პირობების შესაბამისად, რასაც გამოაკლდება მიწოდების (საკურიერო) მომსახურებაზე გაწეული ფაქტობრივი ხარჯები (ასეთის არსებობის შემთხვევაში).

24. პროდუქტზე საკუთრების უფლებისა და რისკების გადასვლის პირობები

24.1. პლატფორმის საშუალებით შეძენილ პროდუქტზე საკუთრების უფლება PSP-დან მომხმარებელზე გადადის პროდუქტის ჯამური ღირებულების სრულად გადახდისა და ასახვის მომენტიდან.

24.2. პლატფორმის საშუალებით შეძენილი პროდუქტის შემთხვევითი დაზიანების, განადგურების, დაღუპვის, გაფუჭების ან დაკარგვის რისკი PSP-დან მომხმარებელზე გადადის პროდუქტის ფაქტობრივად გადაცემის მომენტიდან, შემდეგი წესით:

ა) ადგილზე მიწოდებისას (PSP-ს საკუთარი რესურსით ან მის მიერ შერჩეული კონტრაქტორი გადამზიდავით): რისკი მომხმარებელზე გადადის იმ მომენტიდან, როდესაც მომხმარებელი ან მის მიერ მითითებული მესამე პირი პროდუქტს მიწოდების ადგილზე ფაქტობრივად ჩაიბარებს.

ბ) ადგილზე მიწოდებისას (მომხმარებლის მიერ დამოუკიდებლად შერჩეული გადამზიდავით): რისკი მომხმარებელზე გადადის იმ მომენტიდან, როდესაც PSP პროდუქტს ფაქტობრივად გადასცემს მომხმარებლის მიერ განსაზღვრულ გადამზიდავს/კურიერს.

გ) აფთიაქიდან გატანისას: რისკი მომხმარებელზე გადადის იმ მომენტიდან, როდესაც PSP აფთიაქი ან მისი უფლებამოსილი პირი (ფარმაცევტი) პროდუქტს ფაქტობრივად გადასცემს მომხმარებელს ან მის მიმღებ პირს.

დ) ლოქერიდან გატანისას: რისკი მომხმარებელზე გადადის ლოქერის უჯრის გაღებისა და მომხმარებლის მიერ პროდუქტის უჯრიდან ფაქტობრივად ამოღების მომენტიდან.

25. შეკვეთის გაუქმება

25.1. PSP უფლებამოსილია, ცალმხრივად უარი თქვას სამომხმარებლო ხელშეკრულებაზე და გააუქმოს შეკვეთა ობიექტური გარემოებების არსებობისას, მათ შორის, მაგრამ არა მხოლოდ: პროდუქტის მარაგის ამოწურვის, ნაკლის (წუნის), პლატფორმის სისტემური შეცდომის, მიწოდების ობიექტური შეუძლებლობის, საეჭვო ტრანზაქციის დაფიქსირების ან მომხმარებლის მიერ პროდუქტის დადგენილ ვადაში ჩაუბარებლობის/აფთიაქიდან არ გატანის შემთხვევაში.

25.2. პლატფორმაზე პროდუქტის ხელმისაწვდომობის შესახებ მონაცემები ექვემდებარება პერიოდულ განახლებას და არ ასახავს არსებულ მარაგებს რეალურ დროში. იმ შემთხვევაში, თუ სამომხმარებლო ხელშეკრულების დადების შემდეგ აღმოჩნდება, რომ პროდუქტი ფიზიკურად არ არის ხელმისაწვდომი, PSP ვალდებულია დაუყოვნებლივ შეატყობინოს მომხმარებელს აღნიშნულის შესახებ და გააუქმოს შეკვეთა.

25.3. მომხმარებელი უფლებამოსილია, ყოველგვარი მიზეზის მითითების გარეშე უარი თქვას სამომხმარებლო ხელშეკრულებაზე და მოითხოვოს შეკვეთის გაუქმება ნებისმიერ პროდუქტზე, იმ პირობით, თუ პროდუქტს ჯერ არ დაუტოვებია PSP აფთიაქის ან სხვა ობიექტის ტერიტორია.

25.4. ამ მუხლით გათვალისწინებული შეკვეთის გაუქმებისას, გადახდილი თანხა მომხმარებელს უბრუნდება მომხმარებლისთვის გაუქმების თაობაზე შეტყობინებიდან არაუგვიანეს მომდევნო 14 (თოთხმეტი) კალენდარული დღის ვადაში, წესებითა და პირობებით განსაზღვრული ნორმების შესაბამისად.

26. კანონისმიერი გარანტია

26.1. PSP-ს მიერ მომხმარებლისათვის პროდუქტის ფაქტობრივად გადაცემის მომენტიდან მომდევნო 2 (ორი) კალენდარული წლის განმავლობაში (შემდგომში - „კანონისმიერი გარანტიის მოქმედების ვადა“) მომხმარებელი სარგებლობს „მომხმარებლის უფლებების დაცვის შესახებ“ საქართველოს კანონით განსაზღვრული კანონისმიერი გარანტიით. აღნიშნული გარანტია ითვალისწინებს მომხმარებლის უფლებას, პროდუქტის ხელშეკრულების პირობებთან შეუსაბამობის (ნაკლის) აღმოჩენისას, მოსთხოვოს PSP-ს პროდუქტის უსასყიდლოდ შეკეთება ან ჩანაცვლება, ფასის პროპორციული შემცირება ან უარი თქვას სამომხმარებლო ხელშეკრულებაზე წინამდებარე წესებითა და მოქმედი კანონმდებლობით დადგენილი წესით. კანონისმიერი გარანტია მოქმედებს მხოლოდ საქართველოს ტერიტორიაზე.

26.2. თუ მომხმარებელმა პროდუქტის აშკარა ან ფარული ნაკლი მისი ფიზიკურ მფლობელობაში მიღებიდან 6 (ექვსი) თვის განმავლობაში აღმოაჩინა, საწინააღმდეგოს დამტკიცებამდე იგულისხმება, რომ ნაკლი არსებობდა პროდუქტის მიწოდების მომენტში, თუ, პროდუქტის ბუნებიდან ან ნაკლის ხასიათიდან გამომდინარე, ეს შესაძლებელია. ამ შემთხვევაში იმის მტკიცების ტვირთი, რომ პროდუქტის ნაკლი მიწოდებისას არ არსებობდა, ეკისრება PSP-ს.

26.3. თუ მომხმარებელმა პროდუქტის ნაკლი მისი მფლობელობაში მიღებიდან 6 (ექვსი) თვის გასვლის შემდგომ აღმოაჩინა, იმის მტკიცების ტვირთი, რომ პროდუქტის ნაკლი არსებობდა პროდუქტის მიწოდებისას, სრულად ეკისრება მომხმარებელს.

26.4. პროდუქტის ნაკლს უთანაბრდება ისეთი შემთხვევები, როდესაც PSP მომხმარებელს გადასცემს არასრული კომპლექტაციის, არასწორი რაოდენობის ან სხვა (შეცდომით გაცემულ) პროდუქტს. პროდუქტი ნაკლის მქონედ არ მიიჩნევა, თუ სამომხმარებლო ხელშეკრულების დადების მომენტში მომხმარებელმა იცოდა ან უნდა სცოდნოდა, რომ პროდუქტს გააჩნდა შესაბამისი შეუსაბამობა (ნაკლი).

27. ნაკლიან პროდუქტზე პრეტენზიის წარდგენა

27.1. პლატფორმის საშუალებით შეძენილი პროდუქტის ნაკლის გამოვლენისას, მომხმარებელს მხრიდან პრეტენზიის წარდგენა შესაძლებელია როგორც წერილობით (ელექტრონული ფორმით), ასევე ზეპირი ფორმით, PSP-ს შემდეგ საკომუნიკაციო არხებზე: ა) ელექტრონული ფოსტა: online@psp.ge; ბ) PSP ქოლ-ცენტრი: +995 (032) 240 20 20; გ) პლატფორმაზე ინტეგრირებულ ჩათ-ბოტი ,,PSP ასისტენტი’’.

27.2. მომხმარებლის პრეტენზია უნდა შეიცავდეს:

ა) მომხმარებლის იდენტიფიცირებისთვის საჭირო მონაცემებს;

ბ) შეკვეთის უნიკალურ ნომერს;

გ) პრეტენზიის/ნაკლის დეტალურ აღწერას;

დ) მტკიცებულებებს (ასეთის არსებობის შემთხვევაში).

27.3. პრეტენზიის მიღებიდან დაუყოვნებლივ, მაგრამ არაუგვიანეს 1 (ერთი) კალენდარული დღისა, PSP ადასტურებს პრეტენზიის მიღებას და მომხმარებელს აცნობებს იმ კონკრეტულ PSP აფთიაქის მისამართსა და სამუშაო საათებს, სადაც მან უნდა წარადგინოს პროდუქტი შემოწმების მიზნით.

მომხმარებლის მოთხოვნის დადასტურება PSP-ს მხრიდან როგორც წესი ხორციელდება იმავე ფორმით და იმავე საკომუნიკაციო არხის საშუალებით, რა ფორმით და საშუალებითაც იყო ის თავდაპირველად იყო მოწოდებული მომხმარებლის მხრიდან.

27.4. მომხმარებლის მიერ შესაბამის PSP აფთიაქში პროდუქტის დაბუნებისას, პროდუქტი შემოწმდება:

ა) თუ ადგილზე შემოწმებით ნაკლი დასტურდება, აფთიაქი დაიტოვებს ნაკლიან პროდუქტს და იწყება კანონისმიერი გარანტიით გათვალისწინებული პროცედურები.

ბ) თუ ადგილზე შემოწმებით ნაკლის დადგენა შეუძლებელია, აფთიაქი უფლებამოსილია დროებით დაიტოვოს პროდუქტი სათანადო შემოწმების მიზნით, გონივრული ვადით, მაგრამ არაუმეტეს 14 (თოთხმეტი) კალენდარული დღით და ამავე ვადაში აფთიაქი აცნობებს მომხმარებელს საბოლოო გადაწყვეტილებას.

გ) თუ ნაკლი არ დასტურდება, გასულია კანონისმიერი გარანტიის მოქმედების ვადა ან სახეზე კანონისმიერი გარანტიის პასუხისმგებლობისგან გათავისუფლების სხვა საფუძვლები (იხ. 30-ე მუხლი), აფთიაქი მომხმარებელს განუმარტავს უარის მიზეზს და უკან დაუბრუნებს პროდუქტს.

27.5. PSP აფთიაქისათვის პროდუქტის ფაქტობრივად გადაცემამდე, მომხმარებელი პასუხისმგებელია პროდუქტის სათანადო და უსაფრთხო შენახვაზე, შესაბამისი ფარმაცევტული პროდუქტისთვის დადგენილი შენახვის პირობების სრული დაცვით. აღნიშნულ პერიოდში პროდუქტის შემთხვევითი სრული ან ნაწილობრივ დაზიანების, განადგურების, დაღუპვის, გაფუჭების ან დაკარგვის რისკი და პასუხისმგებლობა ეკისრება მომხმარებელს.

27.6. წინამდებარე წესებისა და პირობების გვერდის ავლით, მომხმარებლის მიერ პროდუქტის PSP აფთიაქში თვითნებურად დატოვება არ მიიჩნევა პროდუქტის სათანადო დაბრუნებად. აღნიშნულ შემთხვევაში, PSP-ს არ ეკისრება ვალდებულება, მიიღოს, შეინახოს ან დაიცვას ასეთი წესით დატოვებული პროდუქტი.

28. პროდუქტის უსასყიდლოდ შეკეთება/შეცვლა

28.1. კანონისმიერი გარანტიის ფარგლებში და მისი მოქმედების ვადაში, მომხმარებლო ხელშეკრულებასთან პროდუქტის შეუსაბამობის (ნაკლის) აღმოჩენისას, მომხმარებელს უფლება აქვს, საკუთარი არჩევანის შესაბამისად, მოსთხოვოს PSP-ს ნაკლიანი პროდუქტის უსასყიდლოდ შეკეთება ან შეცვლა (პირველი რიგის უფლებები).

გამონაკლისი: მომხმარებელს არ აქვს უფლება მოსთხოვოს PSP-ს ნაკლიანი პროდუქტის უსასყიდლოდ შეკეთება ან შეცვლა, თუ ეს, პროდუქტის ბუნებიდან გამომდინარე, შეუძლებელია ან არათანაზომიერი ან შეუსაბამოდ დიდ ხარჯს მოითხოვს.

28.2. იმის განსაზღვრისას, თუ რამდენად არათანაზომიერია ან შეუსაბამოდ დიდია ხარჯია პროდუქტის ნაკლის გამოსწორება, გათვალისწინებული უნდა იქნეს შემდეგი პირობები:

ა) პროდუქტის ფასი მისი ნასყიდობის/სამომხმარებლო ხელშეკრულებით გათვალისწინებულ პირობებთან შესაბამისობის შემთხვევაში;

ბ) ნასყიდობის/სამომხმარებლო ხელშეკრულებით გათვალისწინებულ პირობებთან პროდუქტის შეუსაბამობის ხარისხი;

გ)მომხმარებლისთვის შეფერხების შექმნის გარეშე პროდუქტის ნაკლის გამოსწორების ალტერნატიული შესაძლებლობა.

28.3. PSP ვალდებულია, განახორციელოს პროდუქტის შემოწმება და ნაკლის არსებობის შემთხვევაში, პროდუქტის უსასყიდლო შეკეთება ან შეცვლა გონივრულ ვადაში, მაგრამ არაუგვიანეს 14 (თოთხმეტი) კალენდარული დღის ვადაში. ამ ვადის ათვლა დაიწყება მომხმარებლის მიერ, პროდუქტის PSP-სათვის ფაქტობრივად გადაცემიდან მომდევნო კალენდარული დღიდან.

28.4. იმ შემთხვევაში, თუ პროდუქტის სპეციფიკა ან ნაკლის ბუნება მოითხოვს პროდუქტის შემოწმების ან შეკეთების უფრო ხანგრძლივ პერიოდს, ვიდრე 14 (თოთხმეტი) კალენდარული დღეა, PSP უფლებამოსილია, შესთავაზოს მომხმარებელს დამატებითი გონივრული ვადა. დამატებითი ვადა ძალაში შედის მხოლოდ მომხმარებლის თანხმობის საფუძველზე.

28.5. ნაკლიანი პროდუქტის უსასყიდლოდ შეკეთების ან შეცვლის ყველა ხარჯს (მათ შორის, ტრანსპორტირების, სამუშაო ძალისა და მასალების ხარჯების, რომლებიც საჭიროა პროდუქტის ნაკლის აღმოსაფხვრელად და სამომხმარებლო ხელშეკრულებით გათვალისწინებულ პირობებთან შესაბამისობის უზრუნველსაყოფად სრულად კისრულობს PSP.

29. ფასის შემცირება/ხელშეკრულებაზე უარის თქმა

29.1. კანონსმიერი გარანტიის ფარგლებში და მისი მოქმედების ვადაში, მომხმარებელს უფლება აქვს, საკუთარი არჩევანის შესაბამისად მოსთხოვოს PSP-ს ნაკლიანი პროდუქტის ფასის შემცირება ან უარი თქვას სამომხმარებლო ხელშეკრულებაზე და დააბრუნოს პროდუქტი (მეორე რიგის უფლებები), თუ არსებობს ერთ-ერთი შემდეგი პირობა:

ა)პროდუქტის შეკეთება ან შეცვლა შეუძლებელია;

ბ) PSP-ს საგარანტიო მოქმედების ვადაში არ შეაკეთა ან არ შეცვალა პროდუქტი და მომხმარებელმა დაკარგა ინტერესი პროდუქტის ნაკლის გამოსწორებისადმი;

გ) PSP-ს მიერ პროდუქტის შეკეთება ან შეცვლა მომხმარებელს მნიშვნელოვან შეფერხებას შეუქმნის.

29.2. მომხმარებელს არ აქვს უფლება უარი თქვას სამომხმარებლო ხელშეკრულებაზე და მოსთხოვოს PSP-ს პროდუქტის დაბრუნება, თუ პროდუქტის ნაკლი უმნიშვნელოა.

29.3. PSP ვალდებულია ნაკლიანი პროდუქტის ფასის შემცირების შემთხვევაში, მოახდინოს მომხმარებლისათვის პროდუქტის ნაკლის გამოსწორებისათვის საჭირო შესაბამისი თანხის ნაწილობრივ დაბრუნება, ხოლო მომხმარებლის მიერ მომხმარებლის ხელშეკრულებაზე უარის თქმისა და პროდუქტის დაბრუნების შემთხვევაში, მომხმარებლისათვის პროდუქტის ფასის სრულად დაბრუნება, არაუგვიანეს მომდევნო 14 (თოთხმეტი) კალენდარული დღის ვადაში. ამ ვადის ათვლა დაიწყება მომხმარებლის მიერ, სამომხმარებლო ხელშეკრულებაზე უარის თქმისა და პროდუქტის დაბრუნების ან ნაკლიანი პროდუქტის ფასის შემცირების მოთხოვნის თაობაზე მომხმარებლის მოთხოვნის მიღების მომდევნო დღიდან.

29.4. მომხმარებლისათვის თანხის ნაწილობრივ/სრულად დაბრუნება ხორციელდება იმავე საგადახდო საშუალების გამოყენებით, რომლითაც მომხმარებელმა თავდაპირველად განახორციელა ანგარიშსწორება, გარდა იმ შემთხვევისა, როდესაც მომხმარებელმა მკაფიოდ გამოხატა თანხმობა სხვა საგადახდო საშუალების გამოყენებაზე და ამავდროულად მას დამატებითი ხარჯი არ წარმოეშობა.

29.5. მომხმარებელს უფლება აქვს სამომხმარებლო ხელშეკრულებიდან გასვლის შემთხვევაში მოსთხოვოს PSP-ს სამომხმარებლო ხელშეკრულების შეუსრულებლობით მიყენებული ზიანის ანაზღაურება საქართველოს კანონმდებლობით დადგენილი წესით.

30. კანონისმიერი გარანტიის პასუხისმგებლობისგან გათავისუფლების საფუძვლები

30.1. პლატფორმის საშულებით შეძენილ პროდუქტზე კანონისმიერი გარანტია არ ვრცელდება და PSP სრულად თავისუფლდება სამომხმარებლო ხელშეკრულების პირობებთან პროდუქტის შეუსაბამობაზე (ნაკლზე) პასუხისმგებლობისგან, თუ აღნიშნული შეუსაბამობა წარმოიშვა მომხმარებლისათვის პროდუქტის ფაქტობრივად გადაცემის შემდგომ, მომხმარებლის ან მესამე პირის ბრალეული ქმედებით, პროდუქტის სპეციფიკით, არასწორი ექსპლუატაციით ან PSP-სგან დამოუკიდებელი სხვა ობიექტური გარემოებებით, კერძოდ:

30.1.1. გასულია კანონსმიერი გარანტიის მოქმედების ვადა (2 წელი);

30.1.2. გასულია პროდუქტის ვარგისიანობის ვადა (ასეთის არსებობის შემთხვევაში);

30.1.3. ვერ დგინდება პროდუქტის პლატფორმაზე შეძენის ფაქტი (მაგ. საგადახდო დადასტურების ან შესაბამისი ელექტრონული ტრანზაქციის არარსებობა);

30.1.4. ნაკლი გამოწვეულია პროდუქტის არასწორი, არამიზნობრივი ან თანმხლებ ინსტრუქციასთან შეუსაბამო გამოყენებით, ან მწარმოებლის მიერ დადგენილი მოხმარების, შენახვის, ჰიგიენური ნორმების, სპეციალური ტემპერატურული რეჟიმის ან ტრანსპორტირების წესების დარღვევით;

30.1.5. მომხმარებელმა უარი თქვა პროდუქტის ნაკლის შემოწმების მიზნით მისი PSP-სთვის გადაცემაზე ან პროდუქტის პირველადი ქარხნული შეფუთვის, დამცავი კონტეინერისა თუ კორპუსის ავტორიზებულ გახსნაზე (დაშლაზე);

30.1.6. პროდუქტს აღენიშნება მექანიკური, თერმული, ქიმიური ან ვიზუალური დაზიანება, ნაკლი ან კონსტრუქციული მთლიანობის დარღვევა (დაშლა/კორპუსის გახსნა);

30.1.7. პროდუქტში აღინიშნება სითხის, ტენის, ნესტის ან უცხო სხეულის შეღწევა ან დანესტიანება, რამაც გამოიწვია პროდუქტის პირვანდელი თვისებების ან ფუნქციონირების შეცვლა (შენიშვნა: ეს პირობა ვრცელდება მწარმოებლის მიერ „წყალგამძლე“ მითითების მქონე პროდუქტზეც, თუ სითხის შეღწევა გამოწვეულია მომხმარებლის მიერ მწარმოებლის ექსპლუატაციის წესების დარღვევით);

30.1.8. პროდუქტის ნაკლი გამოწვეულია არაუფლებამოსილი პირის თვითნებური ან არასანქცირებული შეკეთებით (ჩარევით);

30.1.9. დაზიანებულია ან მოხსნილია პროდუქტის ქარხნული პლომბი/ლუქი;

30.1.10. პროდუქტის კომპონენტებში (მაგ.ოპერატიული მეხსიერების (RAM) ან მუდმივი მეხსიერების (SSD, HDD) არაუფლებამოსილი პირის მიერ განხორციელებულია თვითნებური დამატება, გაზრდას ან შეცვლა;

30.1.11. პროდუქტის ნაკლი გამოწვეულია ელექტრო ქსელის გაუმართაობით/დაზიანებით ან ძაბვის მკვეთრი ცვლილებით (ნორმაზე მეტი/ნაკლები მაჩვენებელი);

30.1.12. პროდუქტის ნაკლი გამოწვეულია არასანქცირებული პროგრამული ცვლილებით (მაგ. ვირუსული ფაილები, დარუთული ან გახსნილი სისტემა, არალიცენზირებული პროგრამული უზრუნველყოფა) ან არასანქცირებული ტექნიკური მოდიფიკაციით;

30.1.13. პროდუქტის ნაკლი გამოწვეულია არაორიგინალი ნაწილების/აქსესუარების გამოყენებით (მათ შორის, არაორიგინალი დამტენი ბლოკის გამოყენება, რომლის ვოლტაჟი (V) არ შეესაბამება ან/და ამპერაჟი (A) ნაკლებია ნივთის მწარმოებლის მიერ დადგენილ სტანდარტებზე);

30.1.14. პროდუქტის ნაკლი გამოწვეულია პროდუქტის არასათანადო დამუხტვით/დატენვით (მაგ. ელემენტის ან/და სხვა კომპონენტის/ნაწილის დაზიანება);

30.1.15. პროდუქტი გამოყენებულ იქნა კომერციული, სამეწარმეო, სახელობო ან სხვა პროფესიული მიზნებისთვის (თუ პროდუქტი არ არის განკუთვნილი ასეთი სახით, მიზნით ან/და დატვირთვით მოხმარებისათვის);

30.1.16. პროდუქტის ნაკლი გამოწვეულია ფორს-მაჟორული/დაუძლეველი ძალის გარემოებებით (მაგ. სტიქიური მოვლენები (წყალდიდობა, მიწისძვრა), საომარი მოქმედებები), რომლებიც არ წარმოადგენს მოვაჭრის/მწარმოებლის ბრალეულობას;

30.1.17. პროდუქტის ნაკლი გამოწვეულია მესამე პირის უკანონო ქმედებით (მაგ.ქურდობა,მესამე პირის მიერ მიყენებული განზრახი ზიანი), რომელიც არ წარმოადგენს მოვაჭრის ან მწარმოებლის ბრალეულობას;

30.1.18. პროდუქტის ნაკლი გამოწვეულია ცხოველების, მღრნელების, მავნე მწერების ან სხვა მსგავსი ტიპის ზემოქმედებით (მაგ., მღრღნელების მიერ კაბელების დაზიანება).

30.2. კანონისმიერი გარანტია არ ვრცელდება პროდუქტის იმ კომპონენტებზე ან სახარჯ მასალებზე, რომლებიც ბუნებრივ ცვეთას, განლევას ან მილევას განიცდიან პროდუქტის სტანდარტული ექსპლუატაციის პროცესში (მათ შორის, ელემენტი, აკუმულატორი, კაბელი, დამცავი საფარი, ფილტრი, ჯაგრისი), გარდა იმ შემთხვევებისა, როდესაც კონკრეტული შეუსაბამობა პირდაპირ გამოწვეულია ქარხნული წუნით.

30.3. ნაკლიანი პროდუქტის შეცვლილას, თუ მომხმარებელმა PSP-ს გადასცა პროდუქტი არასრული კომპლექტაციით, შეიცვლება პროდუქტის მხოლოდ ის ნაწილი ან კომპონენტი, რომლის ფაქტობრივი გადაცემაც მოხდა მომხმარებლის მხრიდან. პროდუქტის სპეციფიკაციაში მითითებული დაზიანების საწინააღმდეგო თვისებები (მაგ. წყალგამძლეობა, დარტყმაგამძლეობა) ამცირებს, მაგრამ სრულად არ გამორიცხავს დაზიანების მიღების ალბათობას, რის გამოც მომხმარებელი ვალდებულია ზედმიწევნით დაიცვას მწარმოებლის საექსპლუატაციო მოთხოვნები და მოუფრთხილდეს შეძენილ პროდუქტს მექანიკური, თერმული, ქიმიური თუ ტემპერატურული დაზიანებისგან.

31. კომერციული გარანტია

31.1. კომერციული გარანტია წარმოადგენს კანონისმიერი გარანტიით ნაკისრი ვალდებულებების გარდა, მოვაჭრის ან პროდუქტის მწარმოებლის მიერ მომხმარებლის სასარგებლოდ ნებაყოფლობით და უსასყიდლოდ ნაკისრ დამატებით ვალდებულებებს (პროდუქტის შეცვლა, შეკეთება, ფასის ანაზღაურება და ა.შ.), რომელიც ზოგიერთ შემთხვევაში აუმჯობესებს მომხმარებლის კანონსმიერი გარანტიით გათვალისწინებულ უფლებებს.

31.2. კონკრეტული პროდუქტისთვის დადგენილი ინდივიდუალური კომერციული გარანტიის პირობები ხელმისაწვდომია პლატფორმაზე, შესაბამისი პროდუქტის აღწერის გვერდზე (ასეთის არსებობის შემთხვევაში).

31.3. PSP ვალდებულია დაიცვას მის მიერ გაცემული კომერციული გარანტიის პირობები, მათ შორის, პროდუქტის რეკლამაში მითითებული ვალდებულებები.

31.4. კომერციული გარანტია არ უნდა ზღუდავდეს მომხმარებლის კანონით დადგენილ უფლებებს. ნებისმიერი პირობა, რომელიც ამ უფლებებს ზღუდავს ან აურესებს, ბათილია.

31.5. კანონმდებლობით დადგენილი სავალდებულო მოთხოვნების დარღვევა კომერციული გარანტიის პირობების მიმართ, არ იწვევს თავად კომერციული გარანტიის ბათილობას.

31.6. მომხმარებლის მოთხოვნის შემთხვევაში, PSP ვალდებულია მიაწოდოს მომხმარებელს კომერციული გარანტიის პირობები, წერილობით (მათ შორის, ელექტრონული ფორმით) ან მისთვის მისაღები სხვა ფორმით. კომერციული გარანტია უნდა მოიცავდეს ინფორმაციას კომერციული გარანტიის ხანგრძლივობის, მოქმედების ტერიტორიის, გასაჩივრების წესის, ხანდაზმულობის ვადის და PSP-ს რეკვიზიტების თაობაზე, ასევე, ინფორმაციას იმის შესახებ, რომ კომერციული გარანტია არ ზღუდავს მომხმარებლის კანონმდებლობით დადგენილ უფლებებს.

32. ყოველგვარი მიზეზის მითითების გარეშე პროდუქტის დაბრუნება

32.1. მომხმარებელს უფლება აქვს, ყოველგვარი მიზეზის მითითების გარეშე მოსთხოვოს PSP-ს სამომხმარებლო ხელშეკრულებაზე უარის თქმა და პლატფორმის საშუალებით შეძენილი პროდუქტის დაბრუნება (გარდა წესებითა და პირობების 33-ე მუხლით განსაზღვრული გამონაკლისებისა) მომხმარებლის ან მის მიერ განსაზღვრული მესამე პირის მიერ (გარდა გადამზიდავისა), პროდუქტის მფლობელობაში მიღებიდან მომდევნო 14 (თოთხმეტი) კალენდარული დღის განმავლობაში.

32.2. ამ მუხლში მითითებული 14-დღიანი ვადის გასვლის შემდეგ, მომხმარებელი კარგავს ყოველგვარი მიზეზის მითითების გარეშე სამომხმარებლო ხელშეკრულების უარის თქმისა და პროდუქტის დაბრუნების მოთხოვნის უფლებას.

იმის მტკიცების ტვირთი, რომ ყოველგვარი მიზეზის მითითების გარეშე პროდუქტის დაბრუნების მოთხოვნა ან შეტყობინება PSP-ს მითითებული ვადის ამოწურვამდე წარედგინა, მომხმარებელს ეკისრება.

32.3. ყოველგვარი მიზეზის მითითების გარეშე სამომხმარებლო ხელშეკრულების უარის თქმის შემთხვევაში მომხმარებელს არ დაეკისრება არანაირი ხარჯის (მათ შორის, მიწოდების ხარჯის) გაწევა, გარდა იმ შემთხვევისა, როდესაც მომხმარებელმა PSP-ს მიერ შეთავაზებული სტანდარტული მიწოდების მომსახურებაზე უფრო ძვირი მიწოდების მომსახურება აირჩია ან პროდუქტის ფასი შემცირდა ისეთი სარგებლობის შედეგად, რომელიც დაკავშირებული არ არის საქონლის ბუნების, მახასიათებლებისა და ფუნქციონირების დადგენასთან. პროდუქტის ფასის შემცირების შედეგად წარმოშობილი სხვაობის დაფარვის ვალდებულება მომხმარებელს არ დაეკისრება, თუ PSP-მ მას კანონმდებობით გათვალისწინებულ, სამომხმარებლო ხელშეკრულებაზე უარის თქმის უფლების შესახებ სრული ინფორმაცია არ მიაწოდა.

32.4. მომხმარებლის მიერ ყოველგვარი მიზეზის მითითების გარეშე სამომხმარებლო ხელშეკრულებაზე უარის თქმა ავტომატურად იწვევს დაკავშირებული ამ სამომხმარებლო ხელშეკრულებიდან მის გასვლას და პირვანდელი მდგომარეობის აღდგენას.

32.5. თუ PSP მომხმარებელს არ მიაწვდის ინფორმაციას ყოველგვარი მიზეზის მითითების გარეშე სამომხმარებლო ხელშეკრულებაზე უარის თქმისა და პროდუქტის დაბუნების უფლების თაობაზე, აღნიშნული პროდუქტის დაბრუნება შესაძლებელია ამ მუხლით დადგენილი 14-დღიანი ვადის გასვლიდან მომდევნო 12 (თორმეტი) თვის განმავლობაში.

32.6. თუ PSP-მ მომხმარებელს ამ მუხლით დადგენილი 14-დღიანი ვადის ათვლის მომენტიდან მომდევნო 12 (თორმეტი) თვის ვადაში მიაწოდა ინფორმაცია ყოველგვარი მიზეზის მითითების გარეშე სამომხმარებლო ხელშეკრულებაზე უარის თქმისა და პროდუქტის დაბუნების უფლების თაობაზე,ამ სამომხმარებლო ხელშეკრულებაზე უარის თქმის უფლების შესახებ, პროდუქტის დაბრუნების 7-დღიანი ვადა აღნიშნული ინფორმაციის მიღებიდან აითვლება.

33. პროდუქტები, რომელიც არ ექვემდებარება ყოველგვარი მიზეზის მითითების გარეშე დაბრუნებას

33.1. მომხმარებელს არ აქვს უფლება ყოველგვარი მიზეზის მითითების გარეშე უარი თქვას სამომხმარებლო ხელშეკრულებაზე და დაუბრუნოს PSP-ს პლატფორმის საშუალებით შეძენილი შემდეგი პროდუქტი:

33.1.1. ფარმაცევტული პროდუქტი, სამკურნალო საშუალება;

33.1.2. სურსათი, მათ შორის და არა მხოლოდ, ბავშვთა კვება, რძის ფორმულა, სასურსათო (სურსათის) დანამატი;

33.1.3. პროდუქტი,რომელიც არის მალფუჭებადია ან გააჩნია მოკლე ვარგისობის ვადა;

33.1.4. პროდუქტი, რომელიც მომხმარებელს მიეწოდა ჰერმეტულად დაცული ფორმით და მისი ჰერმეტულობა მომხმარებლისათვის მიწოდების შემდეგ დაირღვა;

33.1.5. პროდუქტი, რომლის დაბრუნება შეუძლებელია ჯანმრთელობის ან ჰიგიენური ნორმების დაცვის გამო;

33.1.6. პროდუქტი, რომელიც საჭიროებს შენახვის სპეციალური პირობების ან/და ტემპერატურული რეჟიმის დაცვას, რომლის დარღვევამ შესაძლოა გამოიწვიოს პროდუქტის თვისებების ცვლილება ან მისი უსაფრთხოების რისკი;

33.1.7. პროდუქტი, რომელსაც დაკარგული აქვს სარეალიზაციო იერსახე (გარდა პროდუქტის გარეგანი დათვალიერების/გატესტვის მიზნით შეფუთვის გახსნისა). სარეალიზაციო იერსახის დაკარგვად მიიჩნევა, მათ შორის:

  • პროდუქტი, რომელიც გამოყენებულია ან აღენიშნება სარგებლობის/ცვეთის კვალი;

  • პროდუქტი, რომლის ქარხნული შეფუთვა, ყუთი, ეტიკეტი, ლუქი ან იარლიყი დაზიანებულია ან მოხსნილია;

  • პროდუქტი, რომელსაც არ ახლავს თანხმლები ნაწილები ან/და დოკუმენტაცია (მათ შორის, შეფუთვა, ყუთი, აქსესუარები, ყურსასმენი, დამტენი, კაბელი, ინსტრუქცია, ანოტაცია, ტექნიკური პასპორტი და სხვა);

  • პროდუქტი, რომელსაც აღენიშნება მექანიკური, თერმული ან ვიზუალური დაზიანება;

  • პროდუქტი, რომელსაც აღენიშნება სითხის, ტენის ან უცხო სხეულის შეღწევა ან დანესტიანება

  • (შენიშვნა: ეს პირობა ვრცელდება მწარმოებლის მიერ „წყალგამძლე“ მითითების მქონე პროდუქტზეც, თუ სითხის შეღწევა გამოწვეულია მომხმარებლის მიერ მწარმოებლის ექსპლუატაციის წესების დარღვევით;

    33.1.8. პროდუქტი, რომელიც გამოყენებულია და გააქტიურებულია ოპერაციული სისტემა ან განხორციელებულია არასანქცირებული ტექნიკური/პროგრამული მოდიფიკაცია;

    33.1.9. პროდუქტი, რომელიც მომხმარებლის ინდივიდუალური შეკვეთით არის დამზადებული ან მის პირად საჭიროებაზეა მორგებული;

    33.1.10. პროდუქტი, რომელიც მომხმარებლისათვის მიწოდების შემდეგ განუყოფლად შეერწყა სხვა პროდუქტს;

    33.1.11. ციფრული შინაარსის მქონე პროდუქტი, რომლის შესრულებაც დაიწყო მომხმარებლის თანხმობით (და მან იცოდა, რომ დაკარგავდა უარის თქმის უფლებას);

    33.1.12. დალუქული აუდიო-ან ვიდეოჩანაწერი ან პროგრამული უზრუნველყოფა, რომლის ლუქი მომხმარებლისათვის მიწოდების შემდეგ დაირღვა;

    33.1.13. პროდუქტი, რომლის ფასი არ აღემატება 30 ლარი.

34. ყოველგვარი მიზეზის მითითების გარეშე პროდუქტის დაბრუნების პროცედურა

34.1. თუ მომხმარებელს სურს ყოველგვარი მიზეზის მითითების გარეშე სამომხმარებლო ხელშეკრულებაზე უარის თქმა და პლატფორმის საშუალებით შეძენილი პროდუქტის დაბრუნება, მომხმარებელი ვალდებულია ამ მუხლში მითითებული 14 (თოთხმეტი) კალენდარული დღის განმავლობაში წარუდგინოს PSP-ს მისი მოთხოვნა პროდუქტის დაბრუნების თაობაზე, წერილობით (ელექტრონული ფორმით), ასევე, ზეპირი ფორმით, PSP-ს შემდეგ საკომუნიკაციო არხებზე: ა) ელექტრონული ფოსტა: online@psp.ge; ბ) PSP ქოლ-ცენტრი: +995 (032) 240 20 20; გ) პლატფორმაზე ინტეგრირებული ჩათ-ბოტი ,,PSP ასისტენტი’’

34.2. ყოველგვარი მიზეზის მითითების გარეშე სამომხმარებლო ხელშეკრულებაზე უარის თქმისა და პროდუქტის დაბრუნების თაობაზე PSP-სათვის მოთხოვნის წარდგენის მიზნით, მომხმარებელს შეუძლია ელექტრონულად შეავსოს სპეციალური ფორმა (იხ. N 1 დანართი) ან დააფიქსიროს შესაბამისი მოთხოვნა, შემდეგი ინფორმაციის მითითებით:

ა)მომხმარებლის სახელი;

ბ) შეკვეთის ნომერი;

გ)შეკვეთის თარიღი;

დ)შეკვეთის მიღების თარიღი;

ე)შეკვეთის მიღების ადგილი/მისამართი;

34.3. ყოველგვარი მიზეზის მითითების გარეშე სამომხმარებლო ხელშეკრულებაზე უარის თქმისა და პროდუქტის დაბრუნების თაობაზე მომხმარებლის მოთხოვნის მიღებიდან დაუყოვნებლივ, არაუგვიანეს მომდევნო 1 (ერთი) კალენდარული დღისა, PSP ადასტურებს მოთხოვნის მიღებას და მომხმარებელს აცნობებს იმ კონკრეტულ PSP აფთიაქის მისამართსა და სამუშაო საათებს, სადაც მან უნდა დააბრუნოს პროდუქტი, ასევე, თუ პროდუქტი არ ექვემდებარება ყოველგვარი მიზეზის მითითების გარეშე დაბრუნებას, ინფორმაცია ამ შეზღუდვის თაობაზე.

მომხმარებლის მოთხოვნის დადასტურება PSP-ს მხრიდან როგორც წესი ხორციელდება იმავე ფორმით და იმავე საკომუნიკაციო არხის საშულებით, რა ფორმით და საშუალებითაც იყო ის თავდაპირველად იყო მოწოდებული მომხმარებლის მხრიდან.

34.4. მომხმარებლის მიერ, შესაბამის PSP აფთიაქში პროდუქტის დაბრუნებისას, პროდუქტი მოწმდება:

ა) თუ პროდუქტი აკმაყოფილების ყოველგვარი მიზეზის მითითების გარეშე სამომხმარებლო ხელშეკრულებაზე უარის თქმისა და პროდუქტის დაბრუნების პირობებს, აფთიაქი დაიტოვებს პროდუქტს და დააინიცირებს ყოველგვარი მიზეზის მითითების გარეშე დაბრუნების პროცედურებს;

ბ) თუ პროდუქტი არ აკმაყოფილების ყოველგვარი მიზეზის მითითების გარეშე სამომხმარებლო ხელშეკრულებაზე უარის თქმისა და პროდუქტის დაბრუნების პირობებს ან/და წარმოადგენს ისეთ პროდუქტეს, რომელიც არ ექვემდებარება ყოველგვარი მიზეზის მითითების გარეშე დაბრუნებას (იხ. 33-ე მუხლი), აფთიაქი მომხმარებელს განუმარტავს უარის მიზეზს და უკან დაუბრუნებს პროდუქტს.

34.5. PSP აფთიაქისათვის პროდუქტის ფაქტობრივად გადაცემამდე, მომხმარებელი პასუხისმგებელია პროდუქტის სათანადო და უსაფრთხო შენახვაზე, შესაბამისი ფარმაცევტული პროდუქტისთვის დადგენილი შენახვის პირობების სრული დაცვით. აღნიშნულ პერიოდში პროდუქტის შემთხვევითი სრული ან ნაწილობრივ დაზიანების, განადგურების, დაღუპვის, გაფუჭების ან დაკარგვის რისკი და პასუხისმგებლობა ეკისრება მომხმარებელს.

34.6. წინამდებარე წესებისა და პირობების გვერდის ავლით, მომხმარებლის მიერ პროდუქტის PSP აფთიაქში თვითნებურად დატოვება არ მიიჩნევა პროდუქტის სათანადო დაბრუნებად. აღნიშნულ შემთხვევაში, PSP-ს არ ეკისრება ვალდებულება, მიიღოს, შეინახოს ან დაიცვას ასეთი წესით დატოვებული პროდუქტი.

34.7. ყოველგვარი მიზეზის მითითების გარეშე სამომხმარებლო ხელშეკრულებაზე უარის თქმის შემთხვევაში PSP ვალდებულია:

ა) მომხმარებელს გადახდილი თანხა, აგრეთვე არსებობის შემთხვევაში − მიწოდების ხარჯის ასანაზღაურებლად გადახდილი თანხა დაუბრუნოს სრულად, გაჭიანურების გარეშე, სამომხმარებლო ხელშეკრულებაზე უარის თქმის შესახებ მოთხოვნის/შეტყობინების მიღებიდან არაუგვიანეს 14 კალენდარული დღისა. PSP ვალდებული არ არის, მომხმარებელს დაუბრუნოს იმ დამატებითი ხარჯის ასანაზღაურებლად გადახდილი თანხა, რომელიც დაკავშირებულია მომხმარებლის მიერ არასტანდარტული ან PSPს-ს მიერ შეთავაზებული მიწოდების მომსახურებაზე უფრო ძვირი მიწოდების მომსახურების არჩევასთან;

ბ) მომხმარებელს თანხა აანაზღაუროს იმავე საგადახდო საშუალების გამოყენებით, რომლებიც მომხმარებელმა გამოიყენა თავდაპირველი ანგარიშსწორებისას, გარდა იმ შემთხვევისა, როდესაც მომხმარებელი სხვა საგადახდო საშუალების გამოყენებაზე მკაფიო თანხმობას განაცხადებს და ამავდროულად მას დამატებითი ხარჯი არ წარმოეშობა.

34.8. ყოველგვარი მიზეზის მითითების გარეშე სამომხმარებლო ხელშეკრულებაზე უარის თქმის შემთხვევაში PSP-ს უფლება აქვს, უარი თქვას თანხის დაბრუნებაზე მანამ, სანამ პროდუქტს არ დაიბრუნებს ან მომხმარებლისგან არ მიიღებს პროდუქტის გაგზავნის დამადასტურებელ დოკუმენტს, იმის მიხედვით, რომელიც უფრო ადრე განხორციელდება, გარდა იმ შემთხვევისა, როდესაც PSP-მ თავად იკისრა პროდუქტის უკან წაღება.

35. ინტელექტუალური საკუთრება

35.1. PSP-ს პლატფორმაზე, ვებგვერდზე, მობილურ აპლიკაციასა და მათ სრულ შინაარსზე (მათ შორის: პროგრამულ კოდზე, დიზაინზე, ინტერფეისზე, მონაცემთა ბაზებზე, კატალოგებზე, ტექსტებზე, ვიზუალურ თუ აუდიომედიაზე) სრულად ვრცელდება PSP-ს ექსკლუზიური ინტელექტუალური და საავტორო უფლებები (©). პლატფორმაზე განთავსებული მესამე პირების (პარტნიორი ბრენდების) სასაქონლო ნიშნები და ლოგოები წარმოადგენს მათი შესაბამისი კანონიერი მფლობელების საკუთრებას.

35.2. კატეგორიულად აკრძალულია პლატფორმიდან ნებისმიერი კონტენტის, მონაცემისა თუ ინტელექტუალური საკუთრების ობიექტის სრული ან ნაწილობრივი კოპირება, რეპროდუცირება, დამუშავება, ასლის დამზადება, გადაცემა ან შენახვა PSP-ს წინასწარი წერილობითი თანხმობის გარეშე, გარდა პირადი, არაკომერციული მიზნებით კანონით დაშვებული გამონაკლისებისა (წყაროს სავალდებულო მითითებით). პლატფორმაზე პროდუქციის შეძენა მომხმარებელზე არ აფართოებს და არ გადასცემს არანაირ ინტელექტუალურ უფლებას.

35.3. დაუშვებელია PSP-ს სასაქონლო ნიშნების ნებისმიერი ფორმით გამოყენება ისეთ პროდუქტთან ან მომსახურებასთან დაკავშირებით, რომელიც არ ეკუთვნის PSP-ს, ან იმგვარად, რამაც შესაძლოა გამოიწვიოს მომხმარებელთა შეცდომაში შეყვანა, მესამე პირებთან აღრევა ან ნებისმიერი ფორმით ზიანი მიაყენოს PSP-ს საქმიან რეპუტაციას.

35.4. პლატფორმის ინტერაქციულ სივრცეებში (ჩათი, შეფასებები, კომენტარები) მასალის (ფოტო, ტექსტი) განთავსებით, მომხმარებელი ადასტურებს, რომ ფლობს მასზე საავტორო უფლებებს და ავტომატურად ანიჭებს PSP-ს უვადო, უსასყიდლო და ექსკლუზიურ უფლებას, დაამუშავოს, შეინახოს, გამოაქვეყნოს ან გამოიყენოს აღნიშნული კონტენტი კანონიერი საინფორმაციო და მარკეტინგული მიზნებისათვის.

35.5. PSP არ აგებს პასუხს მომხმარებლის მიერ პლატფორმის საშუალებით მესამე პირთა ინტელექტუალური უფლებების დარღვევაზე. თუ უფლების მფლობელი მიიჩნევს, რომ პლატფორმაზე განთავსებული მასალა არღვევს მის საავტორო უფლებებს, იგი ვალდებულია ოფიციალური პრეტენზიით მიმართოს PSP-ს ელექტრონულ ფოსტაზე: online@psp.ge, კანონის შესაბამისად.

36. პლატფორმით სარგებლობის წესები და შეზღუდვები

36.1. მომხმარებელი ვალდებულია დაიცვას კიბერუსაფრთხოების ნორმები და არ განახორციელოს ქმედება, რომელიც საფრთხეს შეუქმნის პლატფორმის ფუნქციონირებას ან მონაცემთა მთლიანობას. კერძოდ, იკრძალება:

ა) პლატფორმაზე არამართლზომიერი წვდომის (ჰაკინგი), ფიშინგის ან მავნე პროგრამული უზრუნველყოფის გამოყენება;

ბ) ვირუსების, სპამის, ან არასანქცირებული რეკლამების გავრცელება;

გ) ინტერაქციულ სივრცეებში კონკურენტი პირების ან მესამე მხარეთა სარეკლამო ბმულების განთავსება;

დ) რეიტინგებისა და შეფასებების სისტემით მანიპულირება ან ყალბი ინფორმაციის გენერირება;

ე) შეურაცხმყოფელი, დისკრიმინაციული ან სხვა არამართლზომიერი შინაარსის კონტენტის განთავსება.

36.2. მომხმარებლის ანგარიში და ავტორიზაციის მონაცემები (პაროლი/კოდი) არის პერსონალური. მომხმარებელი ვალდებულია მკაცრად დაიცვას მათი კონფიდენციალურობა. უსაფრთხოების წესების დარღვევის შედეგად დამდგარ ნებისმიერ ზიანზე სრული პასუხისმგებლობა ეკისრება მომხმარებელს.

36.3. PSP უფლებამოსილია ნებისმიერ დროს შეაჩეროს ან შეცვალოს პლატფორმის ფუნქციონალი. PSP უფლებამოსილია გააკონტროლოს მომხმარებელთა მიერ გენერირებული მასალა უსაფრთხოების ნორმების დასაცავად. პლატფორმის კონკრეტულ გვერდზე არსებულ სპეციალურ პირობებთან კოლიზიის შემთხვევაში, უპირატესობა ენიჭება წინამდებარე წესებსა და პირობებს.

36.4. წინამდებარე წესებით დადგენილი შეზღუდვები არ ზღუდავს მომხმარებლის კანონისმიერ უფლებებს, რომლებიც მინიჭებული აქვს მოქმედი კანონმდებლობით. იმ შემთხვევაში, თუ მომხმარებელი არღვევს წესებს, PSP უფლებამოსილია, საკუთარი შეხედულებისამებრ:

ა) შეაჩეროს, დაბლოკოს ან წაშალოს მომხმარებლის ანგარიში;

ბ) შეწყვიტოს მიმდინარე ტრანზაქცია ან უარი თქვას მომსახურებაზე;

გ) მოითხოვოს მიყენებული ზიანის ანაზღაურება;

დ) ინფორმაცია გადასცეს სამართალდამცავ ორგანოებს მოქმედი კანონმდებლობის შესაბამისად.

37. პასუხისმგებლობის შეზღუდვა

37.1. წინამდებარე „წესებისა და პირობების“ ან/და სამომხმარებლო ხელშეკრულების დარღვევა იწვევს მხარეთა პასუხისმგებლობას საქართველოს მოქმედი კანონმდებლობის შესაბამისად. მხარეები ვალდებულნი არიან აუნაზღაურონ ერთმანეთს ნაკისრი ვალდებულებების შეუსრულებლობით ან არაჯეროვანი შესრულებით მიყენებული პირდაპირი და ობიექტურად დამდგარი ზიანი, კანონმდებლობით დადგენილი წესით.

37.2. PSP სრულად თავისუფლდება პასუხისმგებლობისგან იმ ზიანზე, რომელიც მომხმარებელს ან ნებისმიერ მესამე პირს მიადგა პროდუქტის ოფიციალურ ანოტაციაში, საექსპლუატაციო ინსტრუქციაში, თანმხლებ დოკუმენტაციაში ან პლატფორმაზე განთავსებულ აღწერილობაში მითითებული შენახვის, მიღების, დოზირების, უსაფრთხოებისა და გამოყენების წესების/გაფრთხილებების გაუთვალისწინებლობის ან დარღვევის შედეგად.

37.3. PSP ცდილობს უზრუნველყოს პლატფორმის გამართული და უსაფრთხო ფუნქციონირება, თუმცა არ იძლევა გარანტიას, რომ პლატფორმა მუდმივად ხელმისაწვდომი იქნება შეფერხებების გარეშე. PSP არ არის პასუხისმგებელი ზიანზე, რომელიც გამოწვეულია პლატფორმის დროებითი მიუწვდომლობით.

37.4. PSP თავისუფლდება პასუხისმგებლობისგან იმ ზიანზე, რომელიც გამოწვეულია მისგან დამოუკიდებელი ტექნიკური, პროგრამული თუ კომუნალური მიზეზებით (მათ შორის: გარე ქსელების, ინტერნეტ-პროვაიდერების, ელექტროენერგიის მიწოდების შეფერხებებით ან ფორს-მაჟორული გარემოებებით). პლატფორმაზე წვდომისათვის საჭირო გამართული ტექნიკური მოწყობილობებისა და ინტერნეტ-კავშირის უზრუნველყოფა წარმოადგენს მომხმარებლის პასუხისმგებლობას.

37.5. PSP იყენებს ყველა გონივრულ ტექნიკურ ზომას პლატფორმისა და მონაცემთა უსაფრთხოების დასაცავად, თუმცა ვერ გასცემს გარანტიას, რომ პლატფორმა სრულად თავისუფალი იქნება მავნე პროგრამული კოდებისგან. PSP არ აგებს პასუხს მომხმარებლის მოწყობილობის დაზიანებაზე ან მონაცემთა დაკარგვაზე, რომელიც გამოწვეულია მესამე პირთა მხრიდან პლატფორმაზე არასანქცირებული (ჰაკერული) შეღწევის შედეგად.

38. ინფორმაციის სიზუსტე და გარე ბმულები (ლინკები)

38.1. PSP არ აგებს პასუხს მომხმარებლის მიერ რეგისტრაციის ან სახელშეკრულებო ურთიერთობის დროს შეყვანილი პერსონალური თუ საიდენტიფიკაციო ინფორმაციის სიზუსტესა და ნამდვილობაზე.

38.2. პლატფორმაზე განთავსებული ნებისმიერი გარე ვებგვერდის ბმულის (ლინკის) გამოყენებაზე და ამ გარე გვერდების შინაარსსა თუ უსაფრთხოებაზე პასუხისმგებლობა სრულად ეკისრება მომხმარებელს. PSP არ აგებს პასუხს აღნიშნული გარე რესურსების გამოყენებით გამოწვეულ ნებისმიერ ზარალზე.

38.3. წინამდებარე მუხლით გათვალისწინებული პასუხისმგებლობის შეზღუდვები მოქმედებს იმ ფარგლებში, რაც პირდაპირ არ ეწინააღმდეგება „მომხმარებლის უფლებების დაცვის შესახებ“ საქართველოს კანონითა და მოქმედი კანონმდებლობით დადგენილ იმპერატიულ მოთხოვნებს (მათ შორის, პასუხისმგებლობას განზრახვით ან უხეში გაუფრთხილებლობით მიყენებულ ზიანზე).

39. მესამე პირთა ბმულები და სოციალური ქსელები

39.1. PSP-ს პლატფორმის საშუალებით შესაძლოა ხელმისაწვდომი იყოს მესამე პირთა გარე ვებგვერდები, კონტენტი, პროდუქტები ან მომსახურება (მათ შორის ჰიპერბმულების, ბანერების ან სოციალური ქსელების პლაგინების სახით). აღნიშნული ბმულები განთავსებულია ექსკლუზიურად საინფორმაციო მიზნით და არ წარმოადგენს PSP-ს მიერ გაცემულ რეკომენდაციას ან გარანტიას ამ რესურსების შინაარსსა თუ პროდუქციაზე.

39.2. მესამე პირთა ციფრული სივრცეები არ ექვემდებარება PSP-ს კონტროლს. მომხმარებელი მათით სარგებლობს საკუთარი რისკით. PSP არ იძლევა გარანტიას ამ რესურსების უსაფრთხოებასა თუ სისწორეზე და თავისუფლდება პასუხისმგებლობისგან ნებისმიერ ზიანზე, რომელიც შესაძლოა მიადგეს მომხმარებელს მათი გამოყენების შედეგად. მომხმარებელი ვალდებულია გაეცნოს მესამე პირთა რესურსებზე მოქმედ წესებსა და პირობებს.

39.3. პლატფორმაზე მესამე პირების (მათ შორის მომხმარებლების) მიერ განთავსებულ ნებისმიერ ინფორმაციაზე, შეტყობინებასა თუ კომენტარზე პასუხისმგებლობა ეკისრება ექსკლუზიურად მის ავტორს/გამავრცელებელს. PSP არ აგებს პასუხს აღნიშნული ინფორმაციის შინაარსსა და მასთან დაკავშირებულ ქმედებებზე.

40. თაღლითობისა და საეჭვო შემთხვევების დაფიქსირების წესი

40.1. პლატფორმაზე ნებისმიერი უჩვეულო, არასანქცირებული ან საეჭვო ფინანსური ტრანზაქციის დაფიქსირების შემთხვევაში, მომხმარებელი ვალდებულია დაუყოვნებლივ აცნობოს აღნიშნულის შესახებ PSP-ს წინამდებარე წესებით განსაზღვრული ოფიციალური საკომუნიკაციო არხების საშუალებით.

40.2. თუ მომხმარებელს აქვს საფუძვლიანი ეჭვი, რომ მისი პირადი ანგარიშის წვდომის მონაცემები (მომხმარებლის სახელი, პაროლი, უსაფრთხოების კოდი) იქნა დაკარგული, მოპარული, უკანონოდ მითვისებული ან უნებართვოდ გამოყენებული მესამე პირის მიერ, იგი ვალდებულია:

ა) დაუყოვნებლივ შეატყობინოს აღნიშნული ფაქტი PSP-ს;

ბ) საკუთარი ძალებით, დაუყოვნებლივ უზრუნველყოს პლატფორმაზე წვდომის პაროლის შეცვლა.

40.3. ამ ვალდებულებების შეუსრულებლობით ან დაგვიანებით მომხმარებლის ანგარიშსა თუ პერსონალურ მონაცემებზე მიყენებულ ნებისმიერ ზიანზე პასუხისმგებლობა სრულად ეკისრება თავად მომხმარებელს.

41. კომუნიკაცია და ეთიკის ნორმები

41.1. PSP ორიენტირებულია მომხმარებლებთან ჰარმონიულ და პატივისცემაზე დაფუძნებულ ურთიერთობაზე.

41.2. PSP-სთვის მნიშვნელოვანია როგორც მომხმარებლების, ისე პერსონალისა და პარტნიორი მომსახურების მიმწოდებლების (მათ შორის კურიერების) ღირსების, საქმიან რეპუტაციასა და უსაფრთხოების დაცვა.

41.3. PSP მოელის მომხმარებლისაგან ეთიკურ კომუნიკაციასა და კორექტულ დამოკიდებულებას.

41.4. ნებისმიერი საკითხის გადასაჭრელად მომხმარებლის მიერ პლატფორმის წარმომადგენლებთან კომუნიკაცია ხორციელდება მხოლოდ წესებითა და პირობებით კომუნიკაციის მიზნით დადგენილი საკომუნიკაციო არხების გამოყენების გზით.

41.5. ეთიკის ნორმების არაერთგზისი ან უხეში დარღვევის შემთხვევაში, PSP უფლებამოსილია, მოქმედი კანონმდებლობის ფარგლებში, გადახედოს მომხმარებელთან ურთიერთობის ფორმატს ან შესთავაზოს საკითხის მოგვარების ალტერნატიული გზები უსაფრთხო გარემოს უზრუნველსაყოფად.

41.6. მომხმარებლის მხრიდან არაეთიკური, აგრესიული ან არამართლზომიერი ქმედებების (მათ შორის მუქარა, შევიწროება, დისკრიმინაცია, ცილისწამება) ან პლატფორმის წარმომადგენლებთან წესებითა და პირობებით დადგენილი საკომუნიკაციო არხების მიღმა პირადი კომუნიკაციის დამყარების მცდელობისას, PSP უფლებამოსილია, მოქმედი კანონმდებლობის შესაბამისად, მომხმარებლის მიმართ გამოიყენოს პროპორციული ზომები (მაგ. ანგარიშის დროებითი შეზღუდვა).

42. PSP ასისტენტის შესახებ

42.1. PSP ასისტენტი წარმოადგენს ავტომატიზებულ სისტემას (AI ჩათ-ბოტს), რომელიც იყენებს წინასწარ განსაზღვრულ ალგორითმებს ან/და ხელოვნურ ინტელექტს მომხმარებლისთვის სწრაფი საინფორმაციო მხარდაჭერის გასაწევად.

42.2. იმ შემთხვევაში, თუ PSP ასისტენტის საშუალებით AI ჩათ-ბოტი ვერ უზრუნველყოფს მომხმარებლის მიერ დასმული საკითხის სრულყოფილ გადაჭრას, პლატფორმა მომხმარებელს ავტომატურად გადაამისამართდებს PSPის ოპერატორთან. ასევე, თავად მომხმარებელს უფლება აქვს მოითხოვოს პირდაპირი კომუნიკაცია და გადამისამართება PSPის ოპერატორთან, პლატფორმაზე მითითებულ სამუშაო საათებში, ამავე მუხლში განსაზღვრული საკონტაქტო არხების (ტელეფონი, ელ-ფოსტა, ვებ-ჩათი) მეშვეობით.

42.3. AI ჩათ-ბოტი პლატფრომაზე ხელმისაწვდომია უწყვეტ რეჟიმში, ხოლო ოპერატორის მომსახურება ხელმისაწვდომია ორშაბათიდან პარასკევის ჩათვლით, გარდა საქართველოს ორგანული კანონით ,,საქართველოს შრომის კოდექსით“ განსაზღვრულ უქმე დღეების (10:00 – 22:00 საათი).

42.4. PSP ასისტენტის მიერ მოწოდებული ინფორმაცია ატარებს მხოლოდ სარეკომენდაციო-საინფორმაციო ხასიათს და იგი არ წარმოადგენს სამედიცინო რჩევას, დიაგნოზს ან მკურნალობის დანიშვნას. ნებისმიერი სიმპტომის ან ჯანმრთელობასთან დაკავშირებული ჩივილის შემთხვევაში, მომხმარებელი ვალდებულია კონსულტაცია გაიაროს ექიმთან ან კვალიფიციურ სამედიცინო პერსონალთან. პლატფორმაზე მიღებული ინფორმაცია არ ანაცვლებს პროფესიონალურ სამედიცინო მომსახურებას და PSP სრულად იხსნის პასუხისმგებლობას ნებისმიერ შედეგზე, რომელიც შეიძლება მოჰყვეს ამ ინფორმაციის თვითნებურ გამოყენებას ან ექიმის/კვალიფიციური სამედიცინო პერსონალის რეკომენდაციის უგულებელყოფას.

43. დაუძლეველი ძალის (ფორსმაჟორული) გარემოებები

43.1. მხარეები თავისუფლდებიან პასუხისმგებლობისგან წინამდებარე წესებითა და პირობებით/სამომხმარებლო ხელშეკრულებით ნაკისრი ვალდებულებების სრულად ან ნაწილობ შეუსრულებლობისთვის ან დაგვიანებისთვის, თუ ეს გამოწვეულია დაუძლეველი ძალის (ფორსმაჟორული) გარემოებებით.

43.2. ფორსმაჟორულ გარემოებად მიიჩნევა წესებისა და პირობების/სამომხმარებლო ხელშეკრულების ძალაში შესვლის შემდეგ წარმოშობილი, მხარეთა კონტროლისგან დამოუკიდებელი, წინასწარ გაუთვალისწინებელი და გადაულახავი გარემოებები, რომლებიც პირდაპირ და უშუალო ზეგავლენას ახდენენ მხარეთა მიერ ნაკისრი ვალდებულებების შესრულებაზე, მათ შორის:

ა ) ტექნიკური და საოპერაციო შეფერხებები: PSP-ის ტექნიკური სისტემების გათიშვა, პლატფორმის საშუალებით მონაცემთა გადაცემის შეუძლებლობა ან გაუმართაობა, საკომუნიკაციო ტერმინალების ან სატელეკომუნიკაციო აღჭურვილობის გაუმართაობა, ელექტროენერგიის ან/და ინტერნეტსერვისის მიწოდების შეწყვეტა, GPRS-ის გათიშვა, PSP-ის პლატფორმაზე განხორციელებული კიბერშეტევა, PSP-ის პლატფორმის განახლებები, PSP-ის კონტრაქტორი მესამე მხარის გაუმართაობა ან ლოგისტიკის/საქმიანი ოპერაციების შეჩერება/შეწყვეტა;

ბ ) ბუნებრივი და ეპიდემიოლოგიური მოვლენები: სტიქიური უბედურებანი (მიწისძვრა, წყალდიდობა, ხანძარი, მეწყერი, ზვავი), პანდემიის ან/და ეპიდემიის გავრცელება;

გ) სახელმწიფო და საზოგადოებრივი მოვლენები: ომი და საომარი მოქმედებანი, მთავრობის, სახელმწიფოს, ადგილობრივი ან/და სხვა ადმინისტრაციული ორგანოების მიერ დაწესებული აკრძალვები და შეზღუდვები.

დ) სხვა მსგავსი გარემოება.

43.3. მხარე, რომლისთვისაც შეუძლებელი გახდა ვალდებულებების შესრულება დაუძლეველი ძალის გარემოებების გამო, ვალდებულებების შეუსრულებლობის შესახებ პირველივე შესაძლებლობისთანავე აცნობებს მეორე მხარეს ამ გარემოებების წარმოშობისა და დასრულების თაობაზე.

43.4. მხარეების მიერ ნაკისრი ვალდებულებების შესრულება გადაიდება დაუძლეველი ძალის (ფორსმაჟორული) გარემოებების მოქმედების ხანგრძლივობის შესაბამისად.

43.5. თუ დაუძლეველი ძალის (ფორსმაჟორული) გარემოებების არსებობა გრძელდება 30 (ოცდაათ) კალენდარულ დღეზე მეტი ვადით, მხარეები ვალდებულნი არიან გამართონ კონსულტაციები ხელშეკრულების შემდგომი ბედის გადასაწყვეტად. თუ აღნიშნულ პერიოდში მხარეები ვერ მიაღწევენ შეთანხმებას ვალდებულებების შესრულების გაგრძელების შესახებ, თითოეულ მხარეს უფლება აქვს წერილობითი შეტყობინების საფუძველზე შეწყვიტოს წინამდებარე წესები და პირობები/ სამომხმარებლო ხელშეკრულება.

44. მომხმარებლის პრეტენზიების წარდგენა და განხილვა

44.1. წინამდებარე მუხლით დადგენილი წესით განიხილება მომხმარებლის ნებისმიერი სახის პრეტენზია, გარდა ნაკლიან პროდუქტთან დაკავშირებული პრეტენზიისა (იხ. 27-ე მუხლი ) ან ყოველგვარი მიზეზის მითითების გარეშე პროდუქტის დაბრუნების მოთხოვნისა (იხ. 34-ე მუხლი), რომლებსაც არეგულირებს წესებისა და პირობების სპეციალური ნორმები.

44.2. მომხმარებელს მხრიდან პრეტენზიის წარდგენა შესაძლებელია როგორც წერილობით (ელექტრონული ფორმით), ასევე ზეპირი ფორმით, PSP-ს შემდეგ საკომუნიკაციო არხებზე: ა) ელექტრონული ფოსტა: online@psp.ge; ბ) PSP ქოლ-ცენტრი: +995 (032) 240 20 20; გ) პლატფორმაზე ინტეგრირებული ჩათ-ბოტი ,,PSP ასისტენტი“

44.3. მომხმარებლის პრეტენზია უნდა შეიცავდეს:

ა)მომხმარებლის იდენტიფიცირებისთვის საჭირო მონაცემებს;

ბ) შეკვეთის უნიკალურ ნომერს;

გ) პრეტენზიის/დავის საგნის დეტალურ აღწერას;

დ)მტკიცებულებებს (ასეთის არსებობის შემთხვევაში).

44.4. პრეტენზიის მიღებიდან დაუყოვნებლივ, მაგრამ არაუგვიანეს 1 (ერთი) კალენდარული დღისა, PSP ადასტურებს პრეტენზიის მიღებას.

44.5. მომხმარებლის პრეტენზიის დადასტურება PSP-ს მხრიდან როგორც წესი ხორციელდება იმავე ფორმით და იმავე საკომუნიკაციო არხის საშუალებით, რა ფორმით და საშუალებითაც იყო ის თავდაპირველად იყო მოწოდებული მომხმარებლის მხრიდან.

44.6. პრეტენზია განიხილება და PSP-ს მიერ მიღებული გადაწყვეტილების თაობაზე მომხმარებელს ეცნობება მისი მიღებიდან არაუმეტეს 14 (თოთხმეტი) კალენდარული დღის ვადაში. საკითხის სპეციფიკიდან გამომდინარე, აღნიშნული ვადა შესაძლოა გაგრძელდეს დამატებითი გონივრული ვადით, მაგრამ არაუმეტეს დამატებით 10 (ათი) კალენდარული დღით, რის შესახებაც მომხმარებელს ეცნობება მითითებული 14-დღიანი ვადის ამოწურვამდე.

45. მარეგულირებელი კანონმდებლობა და დავების გადაწყვეტა

45.1. წინამდებარე წესები და პირობები და სამომხმარებლო ხელშეკრულება რეგულირდება და განიმარტება საქართველოს კანონმდებლობის შესაბამისად. მხარეთა მიერ ნაკისრი ვალდებულებების შესრულების ადგილად მიჩნეულია საქართველო.

45.2. მხარეები ვალდებულებების შეუსრულებლობისთვის ან არაჯეროვანი შესრულებისთვის პასუხს აგებენ საქართველოს კანონმდებლობის შესაბამისად. ნებისმიერი საკითხი, რომელიც არ არის პირდაპირ გათვალისწინებული ამ წესებით, რეგულირდება საქართველოს კანონმდებლობით დადგენილი შესაბამისი ნორმებით.

45.3. მხარეთა შორის წარმოშობილი ნებისმიერი დავა ან უთანხმოება, რომელიც უკავშირდება წინამდებარე წესებსა და პირობებს, სამომხმარებლო ხელშეკრულებას ან/და პლატფორმით სარგებლობას, უნდა გადაწყდეს ურთიერთმოლაპარაკების გზით.

45.4. ურთიერთმოლაპარაკების გზით შეთანხმების მიუღწევლობის შემთხვევაში, დავას განიხილავს თბილისის საქალაქო სასამართლო, საქართველოს კანონმდებლობის შესაბამისად.

45.5. მომხმარებელს უფლება აქვს ,,მომხმარებლის უფლებების დაცვის შესახებ“ საქართველოს კანონის დარღვევის შემთხვევაში მიმართოს სსიპ. საქართველოს კონკურენციისა და მომხმარებლის დაცვის სააგენტოს (დავის შინაარსის გათვალისწინებით).

46. ცვლილებები

46.1. PSP უფლებამოსილია ნებისმიერ დროს, ცალმხრივად შეიტანოს ცვლილებები ან/და დამატებები წინამდებარე წესებსა და პირობებში.

46.2. PSP უზრუნველყოფს მომხმარებლის ინფორმირებას წესებსა და პირობებში შეტანილი ცვლილებების თაობაზე PSP-სათვის ხელმისაწვდომი საკომუნიკაციო არხებით (მათ შორის,პლატფორმაზე, ვებგვერდზე/აპლიკაციაში განთავსებით, მოკლე ტექსტური შეტყობინების გაგზავნით, შეტყობინებები გაგზავნით ან სხვა ტექნიკური საშუალებებით).

46.3. წესებსა და პირობებში შეტანილი ცვლილება ძალაში შედის მათი პლატფორმაზე გამოქვეყნების ან მომხმარებლისთვის შეტყობინების მომენტიდან. ცვლილებების პლატფორმაზე გამოქვეყნების ან შეტყობინების შემდეგ, მომხმარებლის მიერ პლატფორმის სარგებლობის გაგრძელება, პლატფორმის საშუალებით პროდუქტის შეძენა ან პლატფორმაზე ელექტრონული ფორმით თანხმობის გამოხატვა მიიჩნევა, როგორც განახლებულ წესებსა და პიროებებზე თანხმობის გამოხატვა.

47. დასკვნითი დებულებები

47.1. წესებისა და პირობების დებულებების, მუხლების, პუნქტების ან ქვეპუნქტების სათაურები და დანომრვა გამოყენებულია მხოლოდ მოხერხებულობისთვის და არ განსაზღვრავს მათ შინაარსს ან მის სამართლებრივ მნიშვნელობას.

47.2. წინამდებარე წესების რომელიმე დებულების ბათილად ცნობა არ იწვევს მთლიანი დოკუმენტის ან მისი სხვა დებულებების ბათილობას. ასეთ შემთხვევაში, ბათილი დებულების ნაცვლად, გამოიყენება ისეთი წესი, რომელიც ყველაზე მეტად შეესაბამება წესებით გათვალისწინებულ მიზანს.

47.3. წესებსა და პირობებში დებულებების მუხლების, პუნქტების ან ქვეპუნქტების დანომრვაში/დასათაურებაში ცდომილების არსებობისას, მხარეები იხელმძღვანელებენ შესაბამისი დებულების შინაარსით.

47.4. წესებდა და პირობების ტექსტში მექანიკური ან ტექნიკური შეცდომის/ხარვეზის არსებობის შემთხვევაში, იგი განიმარტება ამ წესების და პირობების საერთო შინაარსისა და კონტექსტის გათვალისწინებით.

47.5. წესებში და პირობებში გამოყენებული ტერმინები გულისხმობს როგორც მხოლობით, ისე მრავლობით რიცხვს (და პირიქით). სქესის აღმნიშვნელი ნაცვალსახელები გულისხმობს ორივე სქესს, თუ კონტექსტიდან სხვა რამ არ გამომდინარეობს

N 1 დანართი

სამომხმარებლო ხელშეკრულებაზე უარის თქმის/პროდუქტის დაბრუნების მოთხოვნის ფორმა

მოვაჭრე:

შპს „პსპ ფარმა“

ს/ნ: 202203123

იურიდიული/ფაქტობრივი მისამართი: საქართველო, ქ.თბილისი, დავით აღმაშენებლის გამზირი №148

საკომუნიკაციო ელექტრონული ფოსტა: online@psp.ge;

საკომუნიკაციო ტელეფონის ნომერი: +995 (032) 240 20 20 (PSP ქოლ-ცენტრი)

შეკვეთის ნომერი: ------------  
შეკვეთის თარიღი: ------------  
შეკვეთის მიღების თარიღი: ------------  
მომხმარებლის სახელი: ------------  
მომხმარებლის მისამართი: ------------  
ფორმის შევსების თარიღი: ------------  
შენიშვნა: ------------